უკრაინის აზოვის პოლკის თანამეთაურმა, მაკსიმ ჟორინმა განაცხადა, რომ რუსული ძალები აგრძელებენ მარიუპოლის დაბომბვას მშვიდობიანი მოსახლეობის ევაკუაციის მოლაპარაკებების ფონზე.

"დაფიქრდით, ქალაქში 100 000-ზე მეტი ადამიანია, ზოგი ნანგრევების ქვეშ, ზოგი სარდაფში. ბევრი მათგანი აზოვსტალის ტერიტორიაზეა, ბევრი ბავშვია, ბევრი ქალი, მოხუცები. დღეს კი, როცა მწვანე დერეფანზე შეთანხმდნენ, რუსები უბრალოდ ცინიკურად ისროდნენ სიმაგრეებზე, თავშესაფრებზე, სადაც მშვიდობიანი მოქალაქეები იყვნენ. ასე რომ, რა თქმა უნდა, რუსების ნდობა არავითარ შემთხვევაში არ შეიძლება", — ციტირებს CNN მეთაურს.

გუშინ, 20 აპრილს ცნობილი გახდა, რომ უკრაინის დელეგაციის წარმომადგენლები — ფრაქცია ხალხის მსახურის თავმჯდომარე დავით არახამია და უკრაინის პრეზიდენტის ადმინისტრაციის უფროსის მრჩეველი მიხაილო პოდოლიაკი მზად არიან ჩავიდნენ მარიუპოლში, რათა რუსულ მხარესთან სამხედროების ევაკუაციის საკითხი განიხილონ.

ვიცე-პრემიერის, ირინა ვერეშჩუკის განცხადებით, 20 აპრილს, ჰუმანიტარული დერეფნით მარიუპოლის 4-მა ავტობუსმა დატოვა.

19 აპრილს დე ფაქტო დონეცკის რესპუბლიკამ თქვა, რომ აზოვსტალზე შეტევა დაიწყეს. ისინი აღნიშნავენ, რომ შეიარაღებითა და არტილერიით რუსი საოკუპაციო ძალები ეხმარებიან. მანამდე რუსეთის თავდაცვის სამინისტრომ განაცხადა, რომ "წმინდა ჰუმანური პრინციპების ხელმძღვანელობით" კიდევ ერთხელ სთავაზობენ მარიუპოლში მყოფ მებრძოლებს ცეცხლის შეწყვეტას. მათი მტკიცებით, არ მოკლავენ არავის, ვინც ტყვედ ჩაბარდება.

მხოლოდ აპრილში რუსეთის მხრიდან მარიუპოლის მცველებისთვის დანებების შესახებ ეს უკვე მესამე მოწოდებაა. ოკუპენტებმა იგივე გააჟღერეს 4 და 17 აპრილს, თუმცა ორივე შემთხვევაში მარიუპოლის სამხედროებმა უარის განუცხადეს და ქალაქის დაცვა გააგრძელეს.

დღეს მარიუპოლის მერის მრჩეველმა გაავრცელა ინფორმაცია, რომ რუსეთის ძალები აზოვსტალსა და მიმდებარედ დასახლებულ სექტორს უტევენ. მისი თქმით, ისინი ტერიტორიას ბომბავენ და იყენებენ მძიმე არტილერიას. როგორც პეტრ ანდრიუშჩენკო აცხადებს, რუსეთის ძალები მაიდენტიფიცირებელი თეთრი ლენტებით, მშვიდობიან მოსახლეობას სნაიპერების სატყუარად იყენებენ.

მარიუპოლი ომის დაწყების პირველივე დღეებიდან ალყაშია, ის ხშირად გახდა თავდასხმის ობიექტი, მათ შორის, მშვიდობიან მოსახლეობაზე. ოკუპანტები სწორედ მარიუპოლში თავს დაესხნენ სამშობიაროს და ბავშვთა საავადმყოფოს. მათ ასევე დაბომბეს თეატრი, სადაც ასობით მშვიდობიანი მოქალაქე აფარებდა თავს. განადგურებულია ქალაქის ინფრასტრუქტურა.

იკრაინის მაღალი თანამდებობის პირები ამბობენ, რომ ქალაქი ჰუმანიტარული კატასტროფის ზღვარზეა. უკრაინის პრეზიდენტი ვოლოდიმირ ზელენსკი და საგარეო საქმეთა მინისტრი დმიტრო კულება ამბობენ, რომ მარიუპოლი მოლაპარაკებების პროცესში, შესაძლოა წითელი ხაზი გახდეს.

იმისთვის, რომ არ გამოგრჩეთ უკრაინაში მიმდინარე პროცესებთან დაკავშირებული სიახლეები, შემოგვიერთდით ჯგუფში — რა ხდება უკრაინაში