ცოტა ხნის წინ ინტერნეტის გული კოლუმბიაში მცხოვრებმა უსახლკარო კაცმა, ჩოკომ და მისმა ორმა ცუგამ მოიგო. სოციალურ ქსელებში გავრცელდა ვიდეო, რომელშიც ვხედავთ ჩოკოს, რომელმაც ერთ-ერთი ცუგას დაბადების დღის აღსანიშნავად ოთხფეხა მეგობრებს მოკრძალებული "წვეულება" მოუწყო — ტორტით, ქუდებითა და სიმღერით.

ჩოკომ ცუგებთან, ნენასთან და შაგისთან ერთად ამ უკანასკნელის დაბადების დღე ქუჩაში იზეიმა. ვიდეოში ის ერთგულ მეგობრებს ეფერება, შემდეგ კი ციცქნა ტორტს იღებს და მეგობრებს უწილადებს.

ვიდეოს გადაღების შემდეგ ვიდეოს ავტორი ჩოკოსთან მივიდა, რათა მისი და ცუგების ცხოვრების შესახებ მეტი შეეტყო. სწორედ ასე გაიგო, რომ ჩოკო რამდენიმე წლის წინ მოძალადე ოჯახის წევრებს გამოექცა და მის შემდეგ ქუჩაში ცხოვრობს. მიუხედავად იმისა, რომ ზედმეტი ფული ნამდვილად არ აქვს, ცდილობს, ცუგებს არაფერი მოაკლოს.

ვიდეო უამრავმა ადამიანმა ნახა, რომლებმაც საბოლოოდ ჩოკოსა და მისი ცუგების ფინანსურად დახმარება და საჭმლით მომარაგება გადაწყვიტეს. პარკს, სადაც ჩოკომ ცუგებს დაბადების დღე გადაუხადა, უამრავი ცხოველის მოყვარული ესტუმრა, რათა ვიდეოს გმირები პირადად გაეცნოთ.

ერთმა გულშემატკივარმა ჩოკოს ტელეფონი აჩუქა, რის შემდეგაც მან ინსტაგრამზე ანგარიში შექმნა. მას უკვე 180 ათასზე მეტი გამომწერი ჰყავს. ჩოკომ მაისურების გაყიდვა დაიწყო, შემოსავლის ნაწილს კი ცხოველების დასახმარებლად იყენებს.

ჩოკოს თქმით, მომავალში მუსიკის სფეროში მოღვაწეობა და ცხოველთა თავშესაფრის გახსნაზე ოცნებობს. რა თქმა უნდა, ყველა მიზნის მიღწევა ნენასთან და შაგისთან ერთად უნდა!