უკრაინის პრემიერმინისტრის, დენის შმიგალის განცახადებით, მარიუპოლი ჯერ კიდევ არ დაცემულა. მისი თქმით, ქალაში კვლავ რჩებიან უკრაინის სამხედრო ძალები.

"ქალაქი მარიუპოლი ჯერ კიდევ არ დაცემულა. იქ ჯერ კიდევ არიან ჩვენი სამხედრო ძალები, ჩვენი ჯარისკაცები, ასე რომ ისინი იბრძვიან ბოლომდე, ისინი კვლავ მარიუპოლში არიან", — თქვა მან ABC News-თან ინტერვიუში.

შმიგალი ამბობს, რომ არც ერთი დიდი ქალაქი არ დაეცემულა. მისი განმარტებით, უკრაინის 900-ზე მეტი ქალაქი, დაბა და სოფელი განთავისუფლდა რუსული ოკუპაციისგან.

"მხოლოდ ხერსონი არის რუსული სამხედრო ძალების კონტროლის ქვეშ, მაგრამ ყველა დანარჩენი ქალაქი უკრაინის კონტროლს ექვემდებარება", — აღნიშნა მან.

შმიგალის განცხადებით, უკრაინა მზადაა, დიპლომატიური გზით შეაჩეროს ეს ომი, თუ ამის შესაძლებლობა იქნება. თუმცა აღნიშნა, რომ არ აპირებენ დანებებას.

"ჩვენ არ დავნებდებით, არ დავტოვებთ ჩვენს ქვეყანას, ოჯახებს, მიწას, ვიბრძოლებთ აბსოლუტურად ბოლომდე, ამ ომში გამარჯვებამდე", — ამბობს ის.

რუსეთმა მარიუპოლის მცველებს ულტიმატუმი წაუყენა და მოუწოდა დღეს, 17 აპრილს 13:00 საათამდე დანებებულიყვნენ. მარიუპოლის მერის მრჩეველმა თქვა, რომ ულტიმატუმის მიუხედავად უკრაინული ძალები განაგრძობენ ბრძოლას. რუსეთის თავდაცვის სამინისტრო კი ულტიმატუმის შეუსრულებლობის გამო, მარიუპოლის მცველების განადგურებით იმუქრება.

გუშინ, 16 აპრილს უკრაინის პრეზიდენტმა, ვოლოდიმირ ზელენსკიმ თქვა, რომ თუ რუსეთი მარიუპოლის მცველებს გაანადგურებს, ეს მოლაპარაკებების გაგრძელებას შეუძლებელს გახდის.

დაახლოებით 100 000 ადამიანი რჩება მარიუპოლში და მის მიმდებარე ტერიტორიაზე, რომლებიც, როგორც ცნობილია, ძირითადად რუსეთის კონტროლის ქვეშ არიან. მარიუპოლში რუსების წინააღმდეგ აზოვის ბატალიონი და 36-ე საზღვაო ქვეითი ბრიგადა იბრძვის. 36-ე ბრიგადა აზოვის ბატალიონს 13 აპრილს შეუერთდა.

იმისთვის, რომ არ გამოგრჩეთ უკრაინაში მიმდინარე პროცესებთან დაკავშირებული სიახლეები, შემოგვიერთდით ჯგუფში — რა ხდება უკრაინაში