უკრაინის დაზვერვის ინფორმაციით, რუსეთის ხელმძღვანელობამ გასცა ბრძანება უკრაინაში რუსული არმიის დანაშაულის ნებისმიერი მტკიცებულება განადგურდეს. ბუჩის გენოციდზე ინფორმაციის გავრცელების შემდეგ რუსულმა ჯარებმა მობილური კრემატორიუმების გამოყენება დაიწყეს.

დაზვერვის ცნობით, მარიუპოლში 13 მობილური კრემატორიუმი დააფიქსირეს, რომლებსაც დაღუპული მშვიდობიანი მოსახლეობის ცხედრებისგან ქუჩების გასასუფთავებლად იყენებენ. მათივე თქმით, ოკუპანტები ფილტრაციის ბანაკების მეშვეობით დანაშაულის ყველა მოწმის გამოვლენასა და განადგურებას ცდილობენ.

"უკრაინის სამხედრო დაზვერვამ არაერთხელ დააფიქსირა მობილური კრემატორიუმის გამოყენების ფაქტები ჩერნიგოვის რეგიონში. მობილური კრემატორიუმების მუშაობა დაფიქსირდა ნოვოაიდარში, ლუგანკის რეგიონში", — აცხადებენ ისინი.

ამასთან, დაზვერვის თქმითვე, ოკუპანტები მოძრავ კრემატორიუმებს რუსი სამხედროების ცხედრების განადგურებისთვისაც იყენებენ. როგორც ისინი ამბობენ, ამის მიზანი უკრაინის წინააღმდეგ რუსული აგრესიის დროს დაღუპული რუსი ჯარისკაცების რეალური რაოდენობა დაფარვა და დაღუპული ოჯახებისთვის კომპენსაციის გადახდისგან თავის არიდებაა.

მედიაში გავრცელდა ფოტოები ბუჩას ქუჩებიდან, რომელიც სავსეა ცხედრებით — მათ ნაწილს ხელები აქვს შეკრული, ნაწილის გვერდით ველოსიპედები ყრია, ნაწილი კი, მინიმუმ, სამი კვირის წინ მაინც არის მოკლული. ამასთან, ოფიციალური პირები აცხადებენ, რომ მარიუპოლში უფრო ცუდი ვითარებაა. უკრაინის პრეზიდენტის, ვოლოდიმირ ზელენსკი თქმით, ქალაქში ათიათასობით ადამიანია დაღუპული.

აღსანიშნია, რომ რუსული მხარე ამ დრომდე დაღუპული რუსი ჯარისკაცები რაოდენობას მალავს.

იმისთვის, რომ არ გამოგრჩეთ უკრაინაში მიმდინარე პროცესებთან დაკავშირებული სიახლეები, შემოგვიერთდით ჯგუფში — რა ხდება უკრაინაში