უკრაინის გენერალური პროკურორის, ირინა ვენედიქტოვას განცხადებით, ბოროდიანკაში ვითარება იმაზე უარესია, ვიდრე ბუჩაში. მისი თქმით, რუსეთის უკრაინაში შეჭრის შედეგად ეს ქალაქი ყველაზე მეტად დაზარალდა.

"ფაქტობრივად, ყველაზე უარესი ვითარება მშვიდობიანი მოქალაქეების მსხვერპლთან დაკავშირებით, ბოროდიანკაშია, ვფიქრობ, ბოროდიანკაზე ცალკე ვისაუბრებთ", — განაცხადა მან.

გენერალური პროკურორი დასძენს, რომ ბუჩადან 23 კილომეტრში მდებარე ბოროდიანკაში მსხვერპლთა რაოდენობა იმაზე მეტი იქნება, ვიდრე სხვა ქალაქებში.

მას შემდეგ, რაც ქალაქებისა და დასახლებების ნაწილზე უკრაინულმა ჯარებმა კონტროლი დაიბრუნეს, ვრცელდება, როგორც ადგილობრივი, ასევე, საერთაშორისო მედიების გადაღებული ფოტო-ვიდეო მასალა, სადაც ჩანს, რომ ქუჩებში ადამიანების ცხედრებია, მათ ნაწილს ხელები აქვს შეკრული.