ქართული ოცნების აღმასრულებელი მდივანი, მამუკა მდინარაძე უკრაინაში ვიზიტთან დაკავშირებით აცხადებს, რომ როდესაც პროტოკოლურად შეთანხმდება ეს საკითხი, მზად არიან, უმრავლესობის რამდენიმე წარმომადგენელი ჩავიდეს უკრაინაში და კიდევ ერთხელ გამოთქვას სამძიმარი.

"უმრავლესობა მზადაა დღესვე, ხვალვე, როცა საჭირო იქნება, როცა პროტოკოლურად შეთანხმდება ეს საკითხი და ფიზიკურად დალაგდება წასვლის თემა, შეგვიძლია რამდენიმე ადამიანი საპარლამენტო შემადგენლობიდან, უმრავლესობის შემადგენლობიდან წავიდეს უკრაინაში და გამოთქვას კიდევ ერთხელ სამძიმარი.

რაც შეეხება პარლამენტის თავმჯდომარის ვიზიტს, მოგეხსენებათ, რომ ეს დამატებით პოლიტიკური დატვირთვის მატარებელია. მან რამდენიმე დღის წინ გამოაქვეყნა წერილი, რომელში მოტანილ არცერთ საკითხთან, კითხვასთან, თხოვნასთან თუ მოთხოვნასთან დაკავშირებით ჯერჯერობით ჩვენ პასუხი არ მიგვიღია. პასუხი დღემდე არ მიგვიღია, სამწუხაროდ, ჩვენი მეგობარი ქვეყნის ხელისუფლებისგან, რატომ დაგვაბრალეს გადაუმოწმებელი და უაპელაციო, თითქოს საქართველო ამ სიტუაციაში, ამ კონკრეტულ მოცემულობაში რძესთან და ყველთან დაკავშირებით რაღაც მოლაპარაკებებს აწარმოებდა რუსეთთან, ოკუპანტ ქვეყანასთან. რატომ დაგვაბრალეს ბოლო დროს ისეთი ამორალური რამ, რასაც იარაღის კონტრაბანდა ჰქვია, რატომ გაიწვიეს ელჩი მაშინ, როდესაც საქართველოს მხარდაჭრა უპრეცედენტოა", — ამბობს მდინარაძე.

8 აპრილს საქართველოში უკრაინის საქმეთა დროებითი რწმუნებულმა, ანდრეი კასინოვმა განაცხადა, რომ რადას თავმჯდომარე ყველა პარლამენტარს, მათ შორის, შალვა პაპუაშვილს ბუჩაში იწვევს, რათა საკუთარი თვალით ნახონ იქ ჩადენილი დანაშაულები. პაპუაშვილის განცხადებით, რიგი "საკითხების განუმარტებლობის ფონზე, ოფიციალური მოწვევა არასათანადოდ ჩანს". პარლამენტის თავმჯდომარემ თქვა ისიც, რომ უკრაინის და უკრაინელი ხალხის მხარდაჭერა ადამიანური და ისტორიული ვალია. პაპუაშვილი ამტკიცებს, რომ ამ ვალს ყველა შემთხვევაში შეასრულებენ, "რაც უნდა უსამართლო და უსაფუძვლო ბრალდებები" ესმოდეთ პასუხად.

ამავე თემაზე: