ირაკლი ღარიბაშვილმა სრული აბსურდი უწოდა უკრაინის დაზვერვის ბრალდებას, რომ საქართველოდან რუსეთში კონტრაბანდული ტვირთი გადის და მთავრობა ხელს უწყობს. მისი თქმით, ამაზე სერიოზული კომენტარის გაკეთება შეუძლებელია, თუმცა მაინც ხაზი გაუსვა, რომ სანქცირებული პროდუქტების გატანას არასდროს დაუშვებენ.

ჟურნალისტების კითხვის პასუხად ღარიბაშვილმა თქვა ისიც, რომ მისთვის "ძალიან სამწუხარო იყო ასეთი ცილისმწამებლური ბრალდების მოსმენა" და ამას "პოლიტიკურად მოტივირებული" უწოდა, რადგან, როგორც ამბობს, მტკიცებულებები არ მიუღიათ.

"მე უკრაინას და უკრაინელებს ვუსურვებდი, რომ რაც შეიძლება მალე დასრულდეს ეს ომი, შეწყდეს ეს დამანგრეველი ომი, რომელიც ძალაინ დიდი გამოწვევაა არამხოლოდ უკრაინისთვის, არამედ ჩვენთვის, მთელი რეგიონისთვის, მთელი ევროპისთვის და მთელი მსოფლიოსთვის.

ასევე მინდა გითხრათ, რომ იცით თქვენ, რომ გაეცა კომპეტენტური პასუხები სხვადასხვა უწყების მხრიდან, გაკეთდა არაერთი განცხადება და განმარტება. მე მინდა ცალსახად განვახადო, რა თქმა უნდა, საქართველო არასოდეს, ვიმეორებ — არასოდეს, არ დაუშვებს იმას, რომ რაიმე სანქცირებული ტვირთის გადატანა და მითუმეტეს, რამდენად აბსურდულია ეს ბრალდება, რომ თითქოს მთავრობა არის ამაში ჩართული. ეს ხომ სრული აბსურდია, ამაზე, რა თქმა უნდა, სერიოზული კომენტარის გაკეთება არ შეიძლება, მაგრამ მინდა გითხრათ, რომ ჩვენ არ დავუშვებთ რაიმე სანქცირებული პროდუქტების საქონლის გატანას ჩვენი ტერიტორიების გამოყენებით. ეს არის ძალიან მკაფიო, ცალსახა პოზიცია" — განაცხადა მან კითხვის პასუხად.

უკრაინის დაზვერვა აცხადებს, რომ რუსეთი ცდილობს საქართველოს ტერიტორიიდან კონტრაბანდული საქონლის შეტანას, რაშიც საქართველოს მთავრობა ხელს უწყობს. მათი ინფორმაციით, ქართულმა სპეცსამსახურებმა მიიღეს დავალება პოლიტიკური პირებისგან, არ ჩარეულიყვნენ ამ საკითხში.

პასუხად ფინანსთა სამინისტრომ განაცხადა, რომ ეს დაუსაბუთებელი და აბსურდული ბრალდებაა. უწყების თქმით, რუსეთისთვის სანქციების დაწესების დღიდან საქართველო ახორციელებს უმკაცრეს კონტროლს ქვეყნის ყველა საბაჟო პუნქტზე.

ქართული ოცნების თავმჯდომარემ, ირაკლი კობახიძემ კი უკრაინის განცხადებას ალოგიკური უწოდა. მან ამ შემთხვევაშიც ნაციონალური მოძრაობის როლზე ისაუბრა და თქვა, რომ ადამიანები, რომლებიც საქართველოში ოპოზიციაში არია, უკრაინის ხელისუფლების ნაწილი არიან.

ამავე თემაზე: