თბილისის საქალაქო სასამართლოში დღეს ე.წ. ფოტოგრაფების საქმის განხილვა მიმდინარეობდა, რომელზეც პირველმა მოწმემ, ფოტოგრაფმა ნათია გედენიძემ, ჩვენებები უკვე მისცა. ხვალ მის ქმარს, ირაკლი გედენიძეს დაკითხავენ.

რუსთავი 2-ის ინფორმაციით, გედენიძემ დეტალურად გაიხსენა 6 წლის წინ მისი დაკავების ფაქტი. ის ამბობს, რომ ძალოვან უწყბებს ჩვენებები იძულებით მისცა.

"არ გამჭირვებია ამომეცნო ბრალდებულის სკამზე მყოფი ადამიანი, დავით დევნოზაშვილი, რომელმაც ჩემი საკუთარი კომპიუტერიდან, რამდენად კანონიერად, მაგრამ ამოიღო ჩემი საკუთარი პირადი ფოტო, რომლითაც მემუქრებოდა, რომ ეს გახდებოდა საჯარო" - განაცხადა ნათია გედენიძემ.

პროკურატურას ე.წ. ფოტოგრაფების საქმეზე ძალოვანი უწყების ერთი ყოფილი თანამშრომელი ჰყავს დაკავებული, კიდევ ერთი პირი კი ინტერპოლის წითელი ცირკულარით იძებნება.

პროკურატურამ 6 დეკემბერს გამართულ ბრიფინგზე განაცხადა, რომ დავით დევნოზაშვილი იყო ის პირი, რომელმაც 2011 წელს ჯაშუშობაში ბრალდებულ ფოტოებს იძულებითა და შანტაჟით დააწერინა აღიარებითი ჩვენებები.

2011 წლის 7 ივლისს, შსს კონტრდაზვერვის დეპარტამენტის თანამშრომლებმა ჯაშუშობის ბრალდებით, ღამის საათებში, საგანგებოდ ჩატარებული სპეცოპერაციის გზით, საკუთარ საცხოვრებელ სახლებში დააკავეს ზურაბ ქურციკიძე, გიორგი აბდალაძე, ირაკლი გედენიძე და ნათელა გედენიძე.