მთავარი პროკურატურის განცხადებით, ე.წ.ფოტორეპორტიორების საქმეზე, შსს-ს კონტრდაზვერვის დეპარტამენტის თბილისის მთავარი სამმართცველოს უფროსის ყოფილი მოადგილე, დავით დევნოზაშვილი დააკავეს. მას ბრალად ედება ძალადობით და დაზარალებულის პირადი ღირსების შეურაცხყოფით განხორციელებული სამსახურეობრივი უფლებამოსილების გადამეტება.

ასევე, ბრალი წაუყენეს მე-8 საპყრობილის ყოფილ დირექტორს, ალექსანდრე მუხაძეს სსკ-ის 333-ე მუხლის პირველი ნაწილით. დანაშაული სასჯელის სახედ და ზომად ითვალისწინებს თავისუფლების აღკვეთას 5-დან 8 წლამდე ვადით.

პროკურატურა აცხადებს, რომ ფოტორეპორტიორების: გიორგი აბდალაძის, ზურაბ ქურციკიძის, ირაკლი და ნათელა გედენიძეების მიმართ გამოტანილი გამამტყუნებელი განაჩენი გადაისინჯება და მოითხოვს, რომ მათ მიმართ თბილისის სააპელაციო სასამართლოში გამამართლებელი განაჩენები დადგეს.

საქმის დეტალები და ფოტოგრაფების მიმართ წაყენებული ბრალდების შინაარსი

პროკურატურის ცნობით, საქართველოს საგარეო საქმეთა სამინისტროს ყოფილი ფოტორეპორტიორი გიორგი აბდალაძე, ევროპის პრეს სააგენტოს ფოტორეპორტიორი ზურაბ ქურციკიძე და საქართველოს პრეზიდენტის ადმინისტრაციის ყოფილი ფოტორეპორტიორი, ირაკლი გედენიძე, 2011 წლის 26 მაისის მოვლენებს აშუქებდნენ, რუსთაველის გამზირზე.

2011 წლის 7 ივლისს, შსს კონტრდაზვერვის დეპარტამენტის თანამშრომლებმა ჯაშუშობის ბრალდებით, ღამის საათებში, საგანგებოდ ჩატარებული სპეცოპერაციის გზით, საკუთარ საცხოვრებელ სახლებში დააკავეს ზურაბ ქურციკიძე, გიორგი აბდალაძე, ირაკლი გედენიძე და ნათელა გედენიძე.

ზურაბ ქურციკიძე 2004 წლიდან დღემდე მუშაობს ევროპის პრეს სააგენტოს (ეპა) ფოტორეპორტიორად, რომლის სათაო ოფისი მდებარეობს ფრანკფურტში, ხოლო ამიერკავკასიის მასშტაბით მოსკოვში.

ნაციონალური მოძრაობის ხელისუფლებაში ყოფნის დროს წაყენებული ჯაშუშობის ბრალდების თანახმად, 2004 წელს, ზურაბ ქურციკიძე მოსკოვში სამსახურებრივი მივლინების დროს, გასამრჯელოს დაპირების საფუძველზე, კონფიდენციალური თანამშრომლობისთვის გადაიბირეს რუსეთის ფედერაციის თავდაცვის სამინისტროს მთავარი სადაზვერვო სამმართველოს თანამშრომლება. ბრალდების მიხედვით, ზურაბ ქურციკიძე სისტემატიურად უგზავნიდა ევროპის პრეს სააგენტოს თანამშრომლებს სახელმწიფო საიდუმლოების შემცველ ფოტოებსა და მასალებს, რომლებსაც ქურციკიძე მოიპოვებდა პრეზიდენტის ადმინისტრაციის პრესსამსახურის ოპერატორის, ირაკლი გედენიძისა და საგარეო საქმეთა სამინისტროს პრესცენტრის ფოტოგრაფის, გიორგი აბდალაძისგან, რომლებმაც თითქოსდა იცოდნენ ქურციკიძის რუსულ სპეცსამსახურებთან თანამშრომლობის შესახებ.

ბრალდების თანახმად, ფოტოგრაფების მიერ შექმნილ ჯაშუშურ ქსელს დახმარებას ასევე უწევდათ ირაკლი გედენიძის მეუღლე, ფოტოგრაფი ნათელა გედენიძე.

ამჟამინდელი პროკურატურის ვერსია

ფოტორეპორტიორების დაკავებას საზოგადოებაში და საერთაშორისო მასშტაბით დიდი გამოხმაურება მოჰყვა, თბილისში დაიწყო აქციები ფოტორეპორტიორების გათავისუფლების მოთხოვნით. საზოგადოება პროკურატურისგან საქმის გასაჯაროებას და უკანონოდ დაკავებული ფოტორეპორტიორების დაუყოვნებლივ გათავისუფლებას ითხოვდა.

ამჟამინდელი პროკურატურის მტკიცებით, სამართალდამცავებმა დაიწყეს ფოტორეპორტიორების მიმართ ფსიქოლოგიური ზეწოლა და შანტაჟი. გამოძიება აცხადებს, რომ ამ გზით სურდათ საპროტესტო ტალღის ჩახრომა.

პროკურატურა წერს, რომ ამ მიზნით, დაკავებულების დროებითი მოთავსების იზოლატორში შეყვანისთანავე, მათთან არაოფიციალურად შედიოდა კონტრდაზვერვის დეპარტამენტის თბილისის ტერიტორიული სამმართველოს უფროსის ყოფილი მოადგილე დავით დევნოზაშვილი სხვა თანამშრომლებთან ერთად. იგი მუქარით დაჟინებით ითხოვდა ჯაშუშურ ქსელში მონაწილეობასთან დაკავშირებით აღიარებით ჩვენებაზე ხელის მოწერას.

პროკურატურა ასევე წერს იმასაც, რომ დაკავებულ ნათელა გედენიძეს დავით დევნოზაშვილმა წარუდგინა სახლის ჩხრეკის დროს კომპიუტერიდან უკანონოდ მოპოვებული ფოტო და აღიარებითი ჩვენების არ მიცემის შემთხვევაში დაემუქრა მისი საჯარო სივრცეში გავრცელებით. მათივე ცნობით, აღნიშნული ფოტო ასევე აჩვენეს დაკავებულ ირაკლი გედენიძეს და დაემუქრნენ მისი გავრცელებით.

უწყების ინფორმაციით, განხორციელებულ ზეწოლას ვერ გაუძლეს ცოლ-ქმარმა, ნათელა და ირაკლი გედენიძეებმა და ისინი იძულებული გახდნენ, ხელი მოეწერათ სამართალდამცავების მიერ "წინასწარ შეთხზული ცრუ აღიარებითი ჩვენებისთვის", რის შემდეგაც ნათელა გედენიძე გაათავისუფლეს დროებითი მოთავსების იზოლატორიდან.

განხორციელებული ფსიქოლოგიური ზეწოლის შედეგად, 8 დღის შემდეგ, ზურაბ ქურციკიძე და გიორგი აბდალაძეც დაითანხმეს აღიარებითი ჩვენების მიცემაზე. მათ საგანგებოდ შეასწავლეს სამართალდამცავების მიერ წინასწარ დაწერილი ჩვენება, რასაც მთელი ღამის განმავლობაში ამეორებინებდნენ დაკავებულებს. მეორე დღეს კი მათი დამცველი ადვოკატების მონაწილეობით ვიდეოკამერაზე ჩაწერეს აღიარებითი ჩვენებები, რასაც ადვოკატების მწვავე პროტესტი მოჰყვა.

როგორც პროკურატურა აცხადებს, გიორგი აბდალაძეს და ზურაბ ქურციკიძეს დააწერინეს განცხადებები და უარი ათქმევინეს მათ დამცველ ადვოკატებზე, რის შემდეგაც იმდროინდელი პროკურატურის მაღალჩინოსნების მოთხოვნით და რეკომენდაციით საქმეში სხვა ადვოკატები ჩაერთვნენ. მათ მონაწილეობა მიიღეს ზურაბ ქურციკიძესთან, გიორგი აბდალაძესთან, ირაკლი და ნათელა გედენიძეებთან საპროცესო შეთანხმების გაფორმებაში.

პროკურატურის განცხადებით, სასჯელაღსრულების დაწესებულების დატოვების შემდეგ, ფოტორეპორტიორებს მკაცრად აუკრძალეს ამ თემაზე ყოველგვარი საუბარი საჯარო სივრცეში.