ქართული ოცნების დეპუტატი, მიხეილ სარჯველაზე ამბობს, რომ უკრაინის დაზვერვის ბრალდებას სჭირდება მტკიცებულებები, წინააღმდეგ შემთხვევაში ის "ბოდიშის მოხდამ უნდა ჩაანაცვლოს". დეპუტატი ფიქრობს, რომ გამორიცხულია ასეთ განცხადებას რამე საფუძველი ჰქონდეს.

"გამორიცხულია, ასეთ ბრალდებებს და ასეთ განცხადებას ჰქონდეს რაიმე საფუძველი. ის მდგომარეობა, რა მდგომარეობაშიც ახლა იმყოფება უკრაინა, მე ვფიქრობ, ამ თვალსაზრისით, გარკვეულ სიფრთხილეს გვავალდებულებს და მეორე მხრივ, რა თქმა უნდა, ზღუდავს შესაძლებლობას, იმაში, რომ რელევანტურად წარვმართოთ პროცესები ჭეშმარიტების დადგენის მიმართულებით.

დაუშვებელი იყო მტკიცებულების გარეშე ასეთი განცხადების გაკეთება და თუ მტკიცებულება ვერ იქნება, რასაკვირველია, მტკიცებულება უნდა ჩაანაცვლოს ბოდიშის მოხდამ", — თქვა მან.

უკრაინის დაზვერვა აცხადებს, რომ რუსეთი ცდილობს საქართველოს ტერიტორიიდან კონტრაბანდული საქონლის შეტანას, რაშიც საქართველოს მთავრობა ხელს უწყობს. მათი ინფორმაციით, ქართულმა სპეცსამსახურებმა მიიღეს დავალება პოლიტიკური პირებისგან, არ ჩარეულიყვნენ ამ საკითხში.

პასუხად ფინანსთა სამინისტრომ განაცხადა, რომ ეს დაუსაბუთებელი და აბსურდული ბრალდებაა. უწყების თქმით, რუსეთისთვის სანქციების დაწესების დღიდან საქართველო ახორციელებს უმკაცრეს კონტროლს ქვეყნის ყველა საბაჟო პუნქტზე.

ქართული ოცნების თავმჯდომარემ, ირაკლი კობახიძემ კი უკრაინის განცხადებას ალოგიკური უწოდა. მან ამ შემთხვევაშიც ნაციონალური მოძრაობის როლზე ისაუბრა და თქვა, რომ ადამიანები, რომლებიც საქართველოში ოპოზიციაში არია, უკრაინის ხელისუფლების ნაწილი არიან.

ამავე თემაზე: