ინდონეზიის სასამართლომ გასულ ორშაბათს სიკვდილით დასჯა მიუსაჯა ისლამური სკოლის მასწავლებელს, რომელმაც 13 მოსწავლე გოგო გააუპატიურა. კაცს თავდაპირველად სამუდამო პატიმრობა მიუსაჯეს, თუმცა პროკურორებმა სასამართლოს მოსთხოვეს, რომ მასწავლებელი სიკვდილით დაესაჯათ, რაც მოსამართლემ დააკმაყოფილა.

მასწავლებელ ჰერი უირავანის შემთხვევამ ინდონეზიის მოსახლეობა შოკში ჩააგდო და აშკარა გახადა, რომ რელიგიურ სკოლებში ბავშვებზე სექსუალურად ძალადობენ. მშობლები მოსწავლეების დასაცავად ქვეყანაში დამატებითი ღონისძიებების გატარებას ითხოვენ.

ფოტო: Reuters

"ჩვენ ბრალდებულს სიკვდილით ვსჯით", — ვკითხულობთ ბანდუნგის უმაღლესი სასამართლოს ვებგვერდზე მასწავლებლის შესახებ. მასწავლებლის ადვოკატი ამ ეტაპზე კომენტარს არ აკეთებს და არ ამბობს, გაასაჩივრებს თუ არა სიკვდილით დასჯის გადაწყვეტილებას. ადგილობრივი პროკურატორის წარმომადგენელიც თავს იკავებს კომენტარისგან და ამბობს, რომ საბოლოო განჩინების მიღებას ელოდება.

2016-2021 წლებში ჰერიმ 12-დან 16 წლამდე ასაკის 13 გოგო გააუპატიურა, რომელთა შორის 8 დაორსულდა. ინდონეზიის ოფიციალური პირები და ბავშვთა დაცვის მინისტრი სიკვდილით დასჯას მხარს უჭერენ. მიუხედავად ამისა, ქვეყნის ადამიანთა უფლებების კომისია, რომელიც სიკვდილით დასჯას ეწინააღმდეგება, სასამართლოს გადაწყვეტილებას აკრიტიკებს.

ინდონეზია მსოფლიოში ერთ-ერთი უდიდესი მუსლიმური ქვეყანაა, რომელშიც ათიათასობით რელიგიური სკოლა ფუნქციონირებს. ამ ეტაპზე რელიგიური სკოლები ინდონეზიის უღარიბესი ოჯახების შვილებისთვის განათლების მიღების ერთადერთი გზაა.