მარგვეთისა და უბისის ეპისკოპოსი, მეუფე მელქისედეკ ხაჩიძე ბუჩას ტრაგედიას ეხმაურება და წერს, რომ ეს 21-ე საუკუნეში არსებული ფაშიზმისა და ნაციზმის შედეგია. მისი თქმით, თუ რუსეთის ბოროტების მანქანა უკრაინაში არ შეჩერდება, ხვალ საქართველოსა და სხვა ქვეყნების რიგი დადგება.

"შეუძლებელია იმ ტრაგედიის აღწერა, რომელიც ბუჩაში დაატრიალეს რუსულმა საოკუპაციო ძალებმა. ესაა ჩვენს თვალწინ, 21-ე საუკუნეში არსებული ფაშიზმისა და ნაციზმის შედეგები. ამ ყველაფრის ჩამდენებსა და მხარდამჭერებს შეუძლებელია რაიმე საერთო ჰქონდეთ არათუ ქრისტიანობასთან, არამედ ნებისმიერ ადამიანურ თვისებასთანაც კი. ეს რუსული საოკუპაციო ძალების ხელწერაა.

მათ იგივე გააკეთეს აფხაზეთში, სამაჩაბლოში, ჩეჩნეთსა და სირიაში, იგივეს აკეთებენ ახლა უკრაინაში და იგივეს გააკეთებენ ხვალ სხვაგან. თუკი დღეს, უკრაინაში არ შეჩერდება რუსული ბოროტების მანქანა, ხვალ ჩვენი და სხვა ქვეყნების რიგი დადგება და ნურავის ექნება იმის ილუზია, რომ მის სამშობლოში შესული რუსული ჯარები ბუჩასგან განსხვავებულად მოიქცევიან", — წერს ის.

ეპისკოპოსი აღნიშნავს, რომ რუსული საოკუპაციო ჯარები საკუთარი ცოდვების სხვებზე გადაბრალებით, თავისი თავის გამართლებას ცდილობენ. ის საზოგადოებას მოუწოდებს, რომ მტრის პროპაგანდას არ აყვნენ.

მას შემდეგ, რაც ქალაქებისა და დასახლებების ნაწილზე უკრაინულმა ჯარებმა კონტროლი დაიბრუნეს, ვრცელდება, როგორც ადგილობრივი, ასევე, საერთაშორისო მედიების გადაღებული ფოტო-ვიდეო მასალა, სადაც ჩანს, რომ ქუჩებში ადამიანების ცხედრებია, მათ ნაწილს ხელები აქვს შეკრული.