უკრაინის პრეზიდენტის ადმინისტრაციის უფროსის მრჩევლის, მიხაილო პოდოლიაკის განცხადებით, მათ შეთავაზებაზე მერკელის პასუხი აჩვენებს, რომ დასავლური ელიტა კვლავ სახიფათო ილუზიებში რჩება.

"მერკელის რეაქცია შეთავაზებაზე, რომ ბუჩაში რუსული სიმხეცეები ნახოს, მიანიშნებს იმაზე, რომ დასავლური ელიტა კვლავ სახიფათო ილუზიებში რჩება. შესაძლო გამოსავალი ბუჩაში მომხდარი ხოცვა-ჟლეტის ფოტო დოკუმენტაციისა და სასამართლო ექსპერტიზების დასკვნების გაგზავნაა ევროპელი პოლიტიკოსებისთვის", — წერს ის Twitter-ზე.

ვოლოდიმირ ზელენსკის კრიტიკის საპასუხოდ, გერმანიის ყოფილი კანცლერი, ანგელა მერკელი ამბობს, რომ სწორი გადაწყვეტილება მიიღო, როდესაც 2008 წელს უკრაინის NATO-ში მიღება დაბლოკა.

დღეს უკრაინის პრეზიდენტმა, ვოლოდიმირ ზელენსკიმ გერმანიის ყოფილი კანცლერი ანგელა მერკელი და საფრანგეთის ყოფილი პრეზიდენტი ნიკოლა სარკოზი ბუჩაში მიიწვია, რათა ნახონ, რა მოიტანა "რუსეთთან 14-წლიანმა დათმობის პოლიტიკამ".

მას შემდეგ, რაც ქალაქებისა და დასახლებების ნაწილზე უკრაინულმა ჯარებმა კონტროლი დაიბრუნეს, ვრცელდება, როგორც ადგილობრივი, ასევე, საერთაშორისო მედიების გადაღებული ფოტო-ვიდეო მასალა, სადაც ჩანს, რომ ქუჩებში ადამიანების ცხედრებია, მათ ნაწილს ხელები აქვს შეკრული.