"ყველა უკრაინელი ფოტოგრაფი ოცნებობს გადაიღოს ფოტო, რომელიც ომს შეაჩერებს", — წერს უკრაინის პირველი ლედი და ამბობს, რომ ეს სიტყვები დაღუპულ ფოტოჟურნალისტს, მაქს ლევინის ეკუთვნის. მისი თქმით, ჟურნალისტს უამრავ წარმატებულ პროექტში ჰქონდა მონაწილეობა მიღებული და ახლაც იღებდა დოკუმენტურ კადრებს.

"როდესაც რუსეთმა ფართომასშტაბიანი აგრესია წამოიწყო, ის გადაღებაზე წავიდა მშობლიურ კიევის რეგიონში საომარი მოქმედებების ზონაში და გაუჩინარდა. ის გარდაცვლილი იპოვეს", —წერს ის.

უკრაინელი ფოტოგრაფი, დოკუმენტალისტი, მაქს ლევინი კიევთან ახლოს მოკლული იპოვეს. ის რამდენიმე კვირის წინ დაიკარგა, როდესაც რუსეთის აგრესიას იღებდა. მისი ცხედარი პირველ აპრილს იპოვეს. ზელენსკა ამბობს, რომ ჟურნალისტს 4 შვილი ჰყავდა.

უკრაინის პირველი ლედი საუბრობს იმაზეც, რომ მაქს ლევინი არ იყო ერთადერთი ჟურნალისტი, რომელიც რუსეთის აგრესიას ემსხვერპლა. მათ შორის არიან, როგორც ადგილობრივი, ასევე საერთაშორისო მედიის წარმომადგენლები. დაღუპულთა გარდა რამდენიმე ჟურნალისტი გატაცებული ჰყავთ ოკუპანტებს.

"მადლობა სიცოცხლის რისკის ქვეშ შეკრებილი ფაქტებისთვის. გთხოვთ გადარჩით!" — წერს ოლენა.

ის ასევე აღნიშნავს, რომ ამ ომში ყველას შეუძლია იყოს ჟურნალისტი და გაავრცელოს რეალური ინფორმაცია, რაც ხდება უკრაინაში. "მთავარია სიმართლის და მხოლოდ სიმართლის ჩვენება. მკვდრებისა და ცოცხლების გულისთვის", — წერს ის.