საფრანგეთის პრეზიდენტმა, ემანუელ მაკრონმა განაცხადა, რომ ის რაც მოხდა ბუჩაში, მოითხოვს სანქციების ახალ რაუნდს და ძალიან მკაფიო ზომებს. მისი თქმით, ახალი სანქციები მიმართული უნდა იყოს ქვანახშირისა და ნავთობის მიმართ.

"არსებობს ძალიან მკაფიო მინიშნებები, რომლებიც მიუთითებს ომის დანაშაულებებზე. მეტ-ნაკლებად დადგენილია, რომ რუსული არმია არის პასუხისმგებელი [ბუჩას მკვლელობებზე]", — განუცხადა მაკრონმა რადიო France Inter-ს.

გუშინ მაკრონმა ბუჩას სურათებს აუტანელი უწოდა და განაცხადა, რომ რუსეთის ხელისუფლებამ ამ დანაშაულებისთვის პასუხი უნდა აგოს.

მას შემდეგ, რაც ქალაქებისა და დასახლებების ნაწილზე უკრაინულმა ჯარებმა კონტროლი დაიბრუნეს, ვრცელდება, როგორც ადგილობრივი, ასევე, საერთაშორისო მედიების გადაღებული ფოტო-ვიდეო მასალა, სადაც ჩანს, რომ ქუჩებში ადამიანების ცხედრებია, მათ ნაწილს ხელები აქვს შეკრული.