ყოფილი პრეზიდენტი, მიხეილ სააკაშვილი იუსტიციის სამინისტროს განცხადებას გამოეხმაურა და აღნიშნა, რომ სამინისტრო ავრცელებს მცდარ ინფორმაციას. მისი თქმით, სინამდვილეში თავად მიმართა სტრასბურგის სასამართლოს, რომ დროებით არ წარადგენდა სარჩელს.

"მინდა განვაცხადო, რომ კატეგორიულად მიუღებელი და დაუშვებელია მცდარი აზოგადოებრივი აზრის შესაქმნელად სტრასბურგის სასამართლოს ინსტრუმენტალიზაცია. იუსტიციის სამინისტროს მხრიდან უკვე მერამდენედ აქვს ადგილი სასამართლოს გადაწყვეტილების შეგნებულ გაყალბებას და ფაქტებით და შეგნებულად მცდარი ინტერპრეტაციებით მანიპულირებას, რითიც ახდენს ადამიანის უფლებათა ევროპული სასამართლოს დისკრედიტაციას ქართული საზოგადოების თვალში. ზემოაღნიშნული ფაქტის თაობაზე დაუყოვნებლივ ეცნობება ადამიანის უფლებათა ევროპულ სასამართლოს", — წერს ის.

როგორც სააკაშვილი აცხადებს, შიმშილობის პერიოდში, ვინაიდან იუსტიციის სამინისტრო უარს ამბობდა მის კლინიკაში გადაყვანაზე, მიმართა ადამიანის უფლებათა ევროპულ სასამართლოს და მოითხოვა საჩივრის შეტანამდე დროებითი ღონისძიებით მთავრობის დავალდებულება, განეხორციელებინა აუცილებელი და კანონით დადგენილი ქმედებები.

"სტრასბურგის სასამართლომ დააკმაყოფილა მოთხოვნა და შესაბამისი დავალება მისცა საქართველოს მთავრობას, რის შედეგადაც გადამიყვანეს გორის სამხედრო ჰოსპიტალში. ამის შემდეგ, 2021 წლის 07 დეკემბერს, წერილობით შევატყობინე სტრასბურგის სასამართლოს, რომ, რადგან ეროვნულ დონეზე სამართლებრივი საშუალებები ჯერ არ არის ამოწურული, ამ ეტაპზე არ წარვადგენ სარჩელს, თუმცა სამომავლოდ დავიტოვებ ამ უფლებას და გამოვიყენებ (იხილეთ ფოტო). სწორედ ამ მიმართვის საფუძველზე, სტრასბურგის სასამართლომ დაასრულა წარმოება მოცემულ საქმეზე, რაზეც მეტყველებს საქმის შეწყვეტის სამართლებრივ საფუძვლად კონვენციის 37.1 მუხლის აღნიშვნა", — ამბობს სააკაშვილი.

დღეს, პირველ მარტს იუსტიციის სამინისტრომ გაავრცელა განცხადება, რომლის მიხედვითაც სტრასბურგმა განსახილველ საქმეთა სიიდან ამორიცხა მიხეილ სააკაშვილის საჩივარი პენიტენციურ სისტემაში მისი მკურნალობისა და მოპყრობის საკითხებთან დაკავშირებით.