სახელმწიფო უსაფრთხოების სამსახურის განცხადებით, რუსმა ოკუპანტებმა სოფელ ზემო არცევთან საქართველოს მოქალაქე უკანონოდ დააკავეს. როგორც უწყებაში ამბობენ, გავრცელებული ინფორმაცია, რომ დაკავებული მოქმედი სამხედროა, სიმართლეს არ შეესაბამება.

"უკანონო დაკავების შესახებ ინფორმაციის მიღებისთანავე, სახელმწიფო უსაფრთხოების სამსახურმა გაააქტიურა ევროკავშირის სადამკვირვებლო მისიის მეშვეობით მოქმედი ცხელი ხაზი. მომხდარის შესახებ ინფორმაცია დაუყოვნებლივ მიეწოდა საერთაშორისო პარტნიორებსა და ჟენევის საერთაშორისო დისკუსიების თანათავმჯდომარეებს.

საქართველოს ცენტრალური ხელისუფლების მიერ ამოქმედებულია მის ხელთ არსებული ყველა მექანიზმი უკანონოდ დაკავებული პირების უმოკლეს ვადებში გასათავისუფლებლად", — ნათქვამია განცხადებაში.