თბილისის სააპელაციო სასამართლოში 10:30 საათზე დაგეგმილია რუსთავი 2-ის საქმის განხილვა. სასამართლოს ეზოში უკვე შეკრებილნი არიან ტელეკომპანიის მხარდამჭერები, რომლებიც მიიჩნევენ, რომ მოსამართლეები პოლიტიკურ ზეწოლას დაექვემდებარებიან და საქალაქო სასამართლოს გადაწყვეტილებას, რუსთავი 2-ის ქიბარ ხალვაშისთვის მიკუთვნებასთან დაკავშირებით, ძალაში დატოვებენ. მსგავსი განწყობა აქვთ სასამართლოში მისულ პოლიტიკოსებსა და თავად რუსთავი 2-ის მენეჯმენტს.

ტელეკომპანიის გენერალური დირექტორის მოადგილის, ზაალ უდუმაშვილის თქმით, შესაძლოა, სასამართლო გადაწყვეტილება დღესვე გახდეს ცნობილი:

"სასამართლომ დაცვის მხარეს 24-საათიანი ვადაც კი არ მისცა, რომ საკუთარი პოზიციები შეეჯერებინა. აქ უკვე ყველაფერი ნათელია. არამხოლოდ გადაწყვეტილებაა წინასწარ მიღებული, სავარაუდოდ, კონკრეტული ვადებიც განუსაზღვრეს სასამართლოს, როდის უნდა გამოაცხადოს გადაწყვეტილება. ყველაფერია უკვე მოსალოდნელი, მე არაფერს არ გამოვრიცხავ. მიუხედავად იმისა, რომ ჯერ კიდევ გარკვეული პროცესუალური საკითხებია გასავლელი, არ არის გამორიცხული, სასამართლო გადაწყვეტილება დღესვე გამოცხადდეს".

On.ge-ს ჟურნალისტი იმყოფება სააპელაციო სასამართლოში და პერიოდულად შემოგთავაზებთ ახალ ამბებს მოვლენათა ეპიცენტრიდან.