პრეზიდენტის ადმინისტრაციის უფროსის, ანდრეი ერმაკის განცხადებით, ჯარების გაყვანაზე რუსეთის მტკიცების მიუხედავად, უკრაინა ამის რეალურ დასტურს ვერ ხედავს. ამის შესახებ მან CNN-თან ინტერვიუში ისაუბრა, რომელსაც პრეზიდენტის ოფისი ავრცელებს.

"გვჯერა, რომ მათ საკუთარი სტრატეგია და გეგმები შეცვალეს. სამწუხაროდ, ეს არ ნიშნავს ომის დასრულებას. შემიძლია ვთქვა, რომ სიტუაცია საკმაოდ რთულია. განსაკუთრებით, მინდა ხაზი გავუსვა ჰუმანიტარულ სიტუაციას — ყველაფერი ძალიან ცუდად არის", — თქვა მან.

მისივე განცხადებით, მარიუპოლში სიტუაცია კატასტროფულია — ხალხი იხოცება შიმშილითა და წყურვილით, რუსები კი მათ ქალაქის დატოვების უფლებას არ აძლევენ.

"რუსები ადგილობრივებს ქალაქის დატოვების საშუალებას არ აძლევენ. მათ ათასობით მოქალაქე წაიყვანეს რუსეთში. ჩვენი, უკრაინის პოზიცია ძალიან ღია და გამჭვირვალეა: ჩვენ გვინდა, რომ ეს ომი დასრულდეს, გვინდა, რომ რუსული ძალები ჩვენი ტერიტორიიდან გავიდნენ. მოვითხოვთ ჰუმანიტარული დერეფნების გახსნას, განსაკუთრებით, მარიუპოლიდან", — აღნიშნა ერმაკმა.

ერმაკმა, ასევე, ხაზი გაუსვა, რომ უკრაინას მეტი იარაღი სჭირდება, რასაც პრეზიდენტი, ვოლოდიმირ ზელენსკი მსოფლიოს გარშემო პარლამენტებში სიტყვით გამოსვლისას ყოველთვის მკაფიოდ აღნიშნავს.

"ჩვენ არ გვაქვს საკმარისი იარაღები და ისინი გვჭირდება, რათა ჩვენი ბრძოლა გავაგრძელოთ. მთელი მსოფლიო ხედავს, რომ უკრაინა ის ერია, რომელიც არასოდეს შეწყვეტს ბრძოლას, რადგან ჩვენი ჩვენი მიწისთვის ვიბრძვით. ჩვენ ვიბრძვით ჩვენი ქვეყნისთვის. ჩვენ ვიბრძვით სრულიად დემოკრატიული მსოფლიოსთვის", — თქვა მან.

მან პრეზიდენტ ზელენსკის როლზეც ისაუბრა და განაცხადა, რომ ის ძალიან მამაცი ადამიანია, რომელიც შედეგებზეა ორიენტირებული.

"ის აბსოლუტური ლიდერია ჩვენი ერის. ის არის ადამიანი, რომელიც ყველა უკრაინელს, მთელს მსოფლიოსა და ყველა ადამიანს საჭირო ენერგიასა და გამბედაობას აძლევს. დარწმუნებული ვარ, რომ მსოფლიოს გარშემო ხალხმა, ვინც უკრაინას მხარს უჭერს, საკუთარი არჩევანი გააკეთა.

ჩვენ ათასობით ადამიანს ვხედავთ მსოფლიოს გარშემო სხვადასხვა ქალაქში ქუჩებში გამოსულებს და ჩვენ გავიმარჯვებთ, უკრაინა გამარჯვებული იქნება. ამაში დარწმუნებულები ვართ. მაგრამ საჭიროა, რომ ეს რაც შეიძლება სწრაფად მოხდეს", — განაცხადა პრეზიდენტის ოფისის ხელმძღვანელმა.

იმისთვის, რომ არ გამოგრჩეთ უკრაინაში მიმდინარე პროცესებთან დაკავშირებული სიახლეები, შემოგვიერთდით ჯგუფში — რა ხდება უკრაინაში