შინაგან საქმეთა მინისტრის, ვახტანგ გომელაურის განცხადებით, ომის დაწყების შემდეგ საქართველოში 30 439 ადამიანი შემოვიდა, გავიდა 17 801, რაც იმას ნიშნავს, რომ დაახლოებით რუსეთის 12 000 მოქალაქე საქართველოდან ჯერ არ გასულა.

"2020 წელს და 2021 წელს თითქმის დაკეტილი იყო საზღვრები და რუსეთიდან კი არა, არცერთი ქვეყნიდან არ შემოდიოდნენ, თუ სპეციალური მოწვეული სტუმარი არ იყო ქვეყანაში პანდემიიდან გამომდინარე, ამიტომ ვადარებთ 2019 წლის იგივე დროს, ომის დაწყებიდან 24-დან 21 დღე რაც გავიდა, ამ შემთხვევაში შემოსულია 30 439 რუსეთის მოქალაქე, გასულია 17 801 ადამიანი. იმავე პერიოდში 2019 წელს შემოსულია 64 008 ადამიანი და გასულია 63 097, ანუ უფრო ნაკლებია გაჩერებული მაშინ, ვიდრე დღეს. დაახლოებით 12 000 ადამიანი არ გასულა, ვინც შემოვიდნენ. არ ვიცი, გავლენ, ალბათ. გუდაურში არიან, ბაკურიანში არიან, ზოგი თბილისშია", — ამბობს ის.

გომელაურის თქმით, ბევრად მეტი მატებაა ბელარუსის მოქალაქეების მხრიდან, ანუ თითქმის 10-ჯერ მეტი ადამიანი შემოვიდა ბელარუსიდან ამავე პერიოდში.

"ბევრად მეტი მატებაა ბელარუსის მოქალაქეების მხრიდან. არის 15 777 შემოსული ომიდან გუშინდელ დღემდე, როცა ანალოგიურ დროს 2019 წელს 1 678 კაცი არის შემოსული, თითქმის10-ჯერ მეტია შემოსული ბელარუსის მოქალაქეები, განსხვავებით რუსეთის მოქალაქეებისგან", — ამბობს ის.