შინაგან საქმეთა მინისტრის, ვახტანგ გომელაურის განცხადებით, ინფორმაცია იმაზე, თუ რა ტექნიკა გაჰყავთ ოკუპირებული ტერიტორიებიდან, დაზუსტებულად არავის აქვს და ვერავინ დაუდასტურებს.

"მე არ ვთვლი, რომ უნდა ვიდგეთ და ამაზე ღია ეთერში ვისაუბროთ. რა ტექნიკა გაჰყავთ და შემოჰყავთ ეს ოპერატიული ინფორმაციაა, დაზუსტებული ფაქტები არავის არ აქვს და ვერავინ დაგვიდასტურებს, აქედან გამომდინარე ამაზე საუბარი არასერიოზული იქნება ჩემი მხრიდან", — განაცხადა მან პარლამენტში.

ეხო კავკაზას ცნობით, რუსეთმა უკრაინაში საომრად ოკუპირებული ცხინვალის სამხედრო ბაზის მე-4 გვარდიის კონტრაქტორები გაგზავნა. მედია წერს, რომ ინფორმაცია სამხრეთ ოსეთის თვითგამოცხადებული რესპუბლიკის ექსპრეზიდენტმა, ედუარდ კოკოითმა დაადასტურა.

სოციალურ ქსელებში გამოქვეყნდა კადრები, სადაც ასახულია სამხედრო ტექნიკის გადაადგილება, რომელიც ოკუპირებული ცხინვალის რეგიონს ტოვებს. ვიდეოს ეხო კავკაზა ავრცელებს.