ქართული ოცნების აღმასრულებელი მდივანი, მამუკა მდინარაძე ამბობს, რომ ზოგიერთი პოლიტიკოსი უკრაინას პიარული მიზნებისთვის იყენებს. მისი აზრით, პრეზიდენტ სალომე ზურაბიშვილის შემთხვევაშიც ასე მოხდა.

"სამწუხაროდ, დღეს რიგი პოლიტიკოსები უკრაინას იყენებენ მხოლოდ და მხოლოდ პიარული მიზნებისთვის და არ მინდა ვინმეს დავაბრალო, მაგრამ ისე ჩანს, რომ ამ შემთხვევაშიც, ასე მოხდა. ახლა უკრაინის თემა არის ყველაზე ემოციური, ყველაზე ცუდად ნათქვამია, მაგრამ, მათი მხრიდან, დანახულს ვამბობ, პოპულარული და ამისი გამოყენება ამ მიზნებისთვის, არიც ცუდი", — თქვა მან.

მდინარაძე ფიქრობს, რომ ზურაბიშვილის ევროპაში შეხვედრები, შესაძლოა, პოპულისტური ნაბიჯი იყო და ამაზე "ლეგიტიმური ეჭვები" ჩნდება. მისივე თქმით, ამას შედეგი არ მოუტანია.

"ლეგიტიმური ეჭვი ჩნდება, პოპულისტური ხომ არ იყო ეს ნაბიჯები, როდესაც მომგებიანი თემაა, მათი გადმოსახედიდან, რა თქმა უნდა, არა ჩემი ნათქვამით, მათი გადმოსახედიდან, ვინც ამას აკეთებს, ეს პრეზიდენტი იქნება თუ სხვა პოლიტიკოსი. მათი აზრით, მომგებიანი თემაა და უკრაინის საკითხებზე წავედი, მაგრამ რა ჩამოტანა, შედეგი რა იყო ამის? ამით ხომ უნდა გავაკეთოთ ანალიზი? ანუ, შეხვდა მაღალი რანგის თანამდებობის პირებს, ძალიან კარგად გამოიყურებოდა ესე, ვიზუალურად ეს შეხვედრები და შედეგი რა მივიღეთ? გუშინ ერთი სიტყვა რომელიმე თქვენგანმა ამ შეხვედრების შესახებ მოისმინეთ?" — თქვა მან.

ქართული ოცნება პრეზიდენტ სალომე ზურაბიშვილის წინააღმდეგ საკონსტიტუციო სასამართლოს მიმართავს. პარლამენტში პრეზიდენტის კრიტიკულ გამოსვლას მმართველმა გუნდმა კრიტიკული განცხადებით უპასუხა. პარტიის პოლიტიკური საბჭოს განცხადებაში ვკითხულობთ, რომ გასული თვეების განმავლობაში შედგა არაერთი შეხვედრა მთავრობის წარმომადგენლებსა და ზურაბიშვილს შორის, სადაც მას არაერთგზის განემარტა კონსტიტუციის შინაარსი, თუმცა, "ოცნების" თქმით, უშედეგოდ.

გუშინ, 15 მარტს პარლამენტში მოხსენებისას ზურაბიშვილმა განაცხადა, რომ 2022 წლის 26 თებერვალს წერილობითი უარი მიიღო ევროპაში სამუშაო ვიზიტების გამართვაზე, რის შემდეგაც საჭიროდ მიიჩნია პირადი კონტაქტების გამოყენება და სამუშაო ვიზიტების პირად შეხვედრებად გადაქცევა. მისი თქმით, ასეთი შეზღუდვები ქვეყნისთვის დამაზიანებელია.

მალევე ქართული ოცნების თავმჯდომარე ირაკლი კობახიძემ თქვა, რომ "თუ ეს მართალია, გამოდის, რომ კონსტიტუცია დაურღვევია" და ამაში გაერკვევიან.

აღსანიშნია ისიც, რომ ზურაბიშვილი სხდომათა დარბაზში უკრაინის უკრაინის საელჩოს წარმომადგენელთან ერთად შევიდა. რის გამოც ქართული ოცნების წევრებმა გააკრიტიკეს და რეგლამენტის მნიშვნელობაზე ისაუბრეს.