ქართული ოცნება პრეზიდენტ სალომე ზურაბიშვილის წინააღმდეგ საკონსტიტუციო სასამართლოს მიმართავს. პარლამენტში პრეზიდენტის კრიტიკულ გამოსვლას მმართველმა გუნდმა კრიტიკული განცხადებით უპასუხა. პარტიის პოლიტიკური საბჭოს განცხადებაში ვკითხულობთ, რომ გასული თვეების განმავლობაში შედგა არაერთი შეხვედრა მთავრობის წარმომადგენლებსა და ზურაბიშვილს შორის, სადაც მას არაერთგზის განემარტა კონსტიტუციის შინაარსი, თუმცა, "ოცნების" თქმით, უშედეგოდ.

"სწორედ საგარეო პოლიტიკის განხორციელების ერთ-ერთი უმნიშვნელოვანესი ინსტრუმენტია ელჩებისა და სხვა დიპლომატიური წარმომადგენლების დანიშვნა. შესაბამისი აქტი პრეზიდენტისა და პრემიერმინისტრის თანახელმოწერით გამოიცემა, ამგვარ აქტზე კი, კონსტიტუციის თანახმად, პოლიტიკური პასუხისმგებლობა მხოლოდ მთავრობას ეკისრება. ეს ნიშნავს, რომ ელჩის განწესების მატერიალურ უფლებამოსილებას კონსტიტუცია მთავრობას ანიჭებს, პრეზიდენტს კი ამ სფეროში მხოლოდ სამართლებრივი და ცერემონიული უფლებამოსილება აქვს მინიჭებული. ამასთან, თანახელმოწერის დათქმაც რომ არ იყოს დადგენილი, ყველა საპარლამენტო რესპუბლიკაში ელჩის დანიშვნის უფლებამოსილება სწორედ ამ სახით განიმარტება — პრეზიდენტი ელჩებს ფორმალურად ნიშნავს, მათ შერჩევაზე კი, პოლიტიკურ-პრაქტიკული თვალსაზრისით, მთავრობაა პასუხისმგებელი.

გასული ერთი წლის განმავლობაში, იყო არაერთი შემთხვევა, როდესაც პრეზიდენტმა მთავრობის მიერ წარდგენილი ელჩის თუ დიპლომატიური წარმომადგენლის დანიშვნაზე უარი განაცხადა, რაც საქართველოს კონსტიტუციას უხეშად ეწინააღმდეგება. გასული თვეების განმავლობაში შედგა არაერთი შეხვედრა მთავრობის წარმომადგენლებსა და პრეზიდენტს შორის, სადაც პრეზიდენტს არაერთგზის ნათლად განემარტა საქართველოს კონსტიტუციის შინაარსი, თუმცა, სამწუხაროდ, უშედეგოდ. ამ პირობებში, საქართველოს მთავრობა იძულებული ხდება, უახლოეს მომავალში მიმართოს საკონსტიტუციო სასამართლოს კომპეტენციების შესახებ დავის პროცედურის ფარგლებში და საქართველოს პრეზიდენტის მხრიდან კონსტიტუციის დარღვევის დადასტურება მოითხოვოს", — ვკითხულობთ განცხადებაში.

მმართველმა პარტიამ პრეზიდენტის გუშინდელი გამოსვლა განიხილა და წერს, რომ მან "მთელი რიგი ახალი თამაშის წესები შემოგვთავაზა". მათი თქმით, აშკარაა, რომ ზურაბიშვილის სურვილია კონსტიტუციის მიღმა იმოქმედოს.

პრეზიდენტის განცხადების პასუხად, რომ მას უარი ეთქვა ევროპაში სამუშაო ვიზიტებზე და შეხვედრების პირადი კონტაქტების გამოყენებით გამართვა მოუწია, ქართული ოცნება აცხადებს, რომ კონსტიტუციის მოქმედი რედაქცია საგარეო პოლიტიკის განხორციელების ექსკლუზიურ უფლებამოსილებას საქართველოს მთავრობას ანიჭებს. მათი თქით, იცოდნენ პრეზიდენტის მთავრობასთან შეუთანხმებელი ვიზიტების შესახებ, თუმცა ეს ფაქტი არ გაააჯაროვეს.

"ჩვენ გავუფრთხილდით პრეზიდენტის ინსტიტუტს და ეს ფაქტი არ გავასაჯაროეთ, თუმცა, ახლა, როდესაც პრეზიდენტმა ის თავად გაასაჯაროა, მასზე პოლიტიკური რეაგირება აუცილებლად მიგვაჩნია. საინტერესოა, რომ გუშინდელ გამოსვლაში პრეზიდენტს მისი ევროპული ვიზიტების შესახებ ერთი სიტყვაც არ უთქვამს, როცა 5 მარტს საგანგებო სხდომის მოწვევას სწორედ ვიზიტის შესახებ სასწრაფო მოხსენების წარდგენის აუცილებლობით ხსნიდა. ეს ფაქტი იმასაც ცხადყოფს, რომ პრეზიდენტი ევროპიდან რაიმე ხელშესახები შედეგის გარეშე დაბრუნდა", — ვკითხულობთ განცხადებაში.

ქართულმა ოცნებამ ყურადღება გაამახვილა იმაზეც, რომ ზურაბიშვილი გუშინ პარლამენტში უკრაინის ელჩის წარმომადგენელთან ერთად მივიდა, ასევე მან თავდაპირველად პარალამენტში მისვლის თარიღი მათთან შეთანხმების გარეშე გამოაცხადა. პარტია აცხადებს, რომ ეს კონსტიტუციისა და კანონმდებლობის დარღვევის უხეში პრეცედენტებია.

"ოცნება" მიიჩნევს, რომ პარლამენტში უკრაინის ელჩის წარმომადგენელთან ერთად მისვლა წინასწარი შეთანხმების გარეშე ნიშნავს იმას, რომ "პრეზიდენტი კარგად ხვდებოდა უხერხულობას, რომელსაც უკრაინის ხელისუფლების მიერ ელჩის გაწვევის პირობებში, ამგვარი აქტი უკავშირდებოდა".

მმართველმა პარტიამ საკუთარ განცხადებაში აღნიშნა, რომ იმედი აქვთ, პრეზიდენტი "არ იმეორებს რადიკალური ოპოზიციის ტაქტიკას, რომელიც სანქციებსა და ომზე ღიად ვერ საუბრობს, თუმცა, ყველა პროვოკაციით ცდილობს, ხელისუფლებას სწორედ აქეთკენ უბიძგოს".

ქართული ოცნება პრეზიდენტს მოუწოდებს, ყურადღებით გაეცნოს საქართველოს კონსტიტუციას და კარგად გაიაზროს საპარლამენტო რესპუბლიკის არსი. მათი თქმით, ასეთ შემთხვევაში, ის მომავალში მაინც იქნება დაზღვეული "შეცდომებისა და გადაცდომებისგან".

გუშინ, 14 მარტს პარლამენტმა პრეზიდენტის მოხსნებას მოუსმინა. მისი სიტყვა უჩვეულოდ კრიტიკული აღმოჩნდა. ზურაბიშვილმა ღიად, შეფარული ტექსტების გარეშე გააკრიტიკა მთავრობისა და ოპოზიციის საჯარო განცხადებები და მათ "ცოდვები" შეახსენა. მეტიც, ზურაბიშვილმა ისიც კი თქვა, რომ ამ ეტაპზე საზოგადოება ბევრად ფხიზელი, შეგნებული, მამაცი და რაც მთავარია, ერთიანია, ვიდრე პარლამენტში მყოფი დეპუტატები.

გაიგეთ მეტი პრეზიდენტის გამოსვლაზე:

• ხელისუფლება ვალდებულია საზოგადოებას მიაწოდოს ზუსტი ინფორმაცია — ზურაბიშვილი რუსეთის მოქალაქეების შემოსვლაზე
• ზურაბიშვილი: ჩვენი გზა ხომ ერთია: პრინციპული, თუმცა გონივრული
• მოვუწოდებ მთავრობას, შეიქმნას უსაფრთხოების საბჭოს გაფართოებული ფორმატი — ზურაბიშვილი
• ზურაბიშვილი: ამ ტრიბუნიდან მივმართავ ჩემს კოლეგას და მეგობარს, ვოლოდიმირ ზელენსკის და ვთხოვ, დააბრუნოს ელჩი
• ზურაბიშვილი: უნდა მოვემზადოთ ყველა შესაძლო შემთხვევისთვის და არა პასიურად ვისხდეთ
• ზურაბიშვილი: უკრაინის დამსახურებაა დღეს უკვე იზოლირებული და ხვალ უკვე დასუსტებული რუსეთი