24 თებერვალს რუსეთი უკრაინაში შეიჭრა და ომი წამოიწყო, რომელიც დღემდე გრძელდება. რუსეთის აგრესიის დასაგმობად უამრავმა კომპანიამ მაღაზიები დახურა და პროდუქციის რუსეთში შეტანა შეაჩერა ან შეწყვიტა. მათ შორის McDonald's-იცაა, რომელმაც ცოტა ხნის წინ დააანონსა, რომ ქვეყანაში 850-მდე ფილიალს ხურავს.

როგორც ჩანს, McDonald's-ის საჭმლის გარეშე დარჩენას რუსეთი ძალიან განიცდის, რადგან ახალი ამბის გავრცელების შემდეგ რუსულ საიტებზე, მაგალითად, Avito.ru-ზე მომხმარებლები McDonald's-ის ბურგერებს სხვა პროდუქციასთან ერთად ყიდიან.

ინტერნეტში McDonald's-ის ბურგერები, სასმელი, ღვეზელები, სოუსები და ქაღალდის პარკებიც კი იყიდება. რა თქმა უნდა, პროდუქცია გაცილებით ძვირი ღირს. ზოგიერთ შემთხვევაში პროდუქტის ფასი ათას ლარსაც კი აჭარბებს. ფასები გაათმაგებული, ზოგჯერ კი გაასმაგებულიც კია. მაგალითად, ერთ-ერთი მომხმარებლის მიერ გასაყიდად დადებული ბიგ მაკის ფასი დაახლოებით 177 ლარია, საქართველოში კი მისი ფასი 13,15 ლარია

პროდუქციის აღწერაში მისი შეძენის დროა მითითებული. გამყიდველები მყიდველებს მოუწოდებენ, რომ მოასწრონ საყვარელი საჭმლის კიდევ ერთხელ ჭამა.

აღსანიშნავია, რომ McDonald's-ის მიერ რუსეთში საქმიანობის აქამდე გაგრძელებას ინტერნეტსივრცეში განსაკუთრებული კრიტიკა მოჰყვა. რუსეთის ბაზარზე უარი ისეთმა ბრენდებმა განაცხადეს, როგორებიცაა Apple, Levi's, Starbucks, Zara, Ikea და სხვ.

ამავე თემაზე:

როგორ ჩაანაცვლებ(დნ)ენ რუსები ბრენდებს, რომლებმაც რუსეთი დატოვეს — 10 ილუსტრაცია