გასულ შაბათ-კვირას დოჰაში გამართულ მსოფლიო თასის კვარცხლბეკზე რუსი ტანმოვარჯიშე უკრაინელი გამარჯვებულის გვერდით იმ მაისურით წარსდგა, რომელზეც ასო "Z" ეწერა. შეგახსენებთ, რომ უკრაინაში შეჭრილ რუსულ სამხედრო ტექნიკას ასო "Z" აწერია, რაც ბოლო პერიოდში პრორუსულ მნიშვნელობას ატარებს.

ტანვარჯიშის საერთაშორისო ფედერაციამ (FIG) რუსი ტანმოვარჯიშის, ივან კულიაკის, ქმედება "შოკისმომგვრელად" შეაფასა. "ტანვარჯიშის საერთაშორისო ფედერაციამ რუსეთისა და ბელარუსის წინააღმდეგ დამატებითი ზომები მიიღო. 2022 წლის 7 მარტიდან რუს და ბელარუს სპორტსმენებს და ასევე ამ ქვეყნების წარმომადგენელ ოფიციალურ პირებს, მათ შორის ჟიურის წევრებს, ტანვარჯიშის საერთაშორისო ფედერაციის მიერ გამართულ შეჯიბრებებში მონაწილეობის უფლება აღარ ექნებათ", — ვკითხულობთ ფედერაციის ოფიციალურ განცხადებაში.

ფოტო: Reuters

უკრაინის ომში ბელარუსია რუსეთის ერთ-ერთ მოკავშირედ განიხილება. საერთაშორისო ოლიმპიურმა კომიტეტმა უკვე გასცა რეკომენდაცია იმის შესახებ, რომ რუს და ბელარუს სპორტსმენებს სხვადასხვა საერთაშორისო შეჯიბრებებში მონაწილეობის მიღება აეკრძალოთ.

აღსანიშნავია, რომ დოჰაში გამართული შეჯიბრის გამარჯვებული უკრაინელი ილია კოვტუნი გახდა, რომელსაც ოქროს მედალი გადაეცა. მეორე ადგილზე ყაზახეთის წარმომადგენელი გავიდა, ხოლო ივან კულიაკმა მესამე ადგილი დაიკავა.