ბილ ო'რაილის 21 წლიანი კარიერა ტელეკომპანია Fox News-ში დასრულებულია. სატელევიზიო ბადიდან ამოღებულია მისი შოუ The O'Reilly Factor-იც.

ამერიკული ტელეარხიდან ქვეყნის ერთ-ერთი ყველაზე პოპულარული წამყვანის ჩამოშორების მიზეზი გავრცელებული ცნობებია, რომელთა მიხედვითაც, ო'რაილი ქალ კოლეგებს სექსუალურად ავიწროებდა.

CNN-ის ცნობით, 21st Century Fox-ის მფლობელმა რუპერტ მერდოკმა, თავის შვილებთან, ჯეიმსთან და ლაკლენთან, ერთად განცხადება გაავრცელა:

"ბრალდებების დიდი სიფრთხილით განხილვის შემდეგ, Fox News Channel და ბილ ო'რაილი შეთანხმდნენ, რომ ო'რაილი ჩვენს არხზე აღარ დაბრუნდება".

თავის მხრივ, ო'რაილიმ განაცხადა, რომ ერთ-ერთი ყველაზე წარმატებული საინფორმაციო გამოშვების წამყვანის პოზიციაზე ყოფნა მისთვის საამაყოა და მწუხარებას გამოთქვამს, რომ Fox News-სთან 21 წლიანი თანამშრომლობა "დაუსაბუთებელი ბრალდებების" გამო დაასრულდა. ტელეწამყვანმა არხს წარმატება უსურვა.

გავრცელებული ინფორმაციის მიხედვით, ხუთმა ქალმა, ო'რაილისგან შევიწროების გამო, 13 მილიონი აშშ დოლარი მიიღო. ამის შემდეგ, 50-ზე მეტმა სპონსორმა მისი შოუდან, The O'Reilly Factor, რეკლამები მოხსნა.

უცნობია გადაუხდის თუ არა Fox News ო'რაილს. ტელეწამყვანთან მრავალწლიანი კონტრაქტის შეჩერება, არხს, სავარაუდოდ, ათეულობით მილიონი დოლარი დაუჯდება, თუმცა უცნობია, არსებობს თუ არა მათ შორის დადებულ ხელშეკრულებაში გარემოებები, რომლებიც ტელეკომპანიას ამ ვალდებულებას თავიდან აარიდებს.