ეგვიპტეში, სინაის ნახევარკუნძულის სამხრეთით, წმ. ეკატერინეს სახელობის ქრისტიანულ მონასტერთან განთავსებულ პოლიციის ბლოკპოსტს შეიარაღებული პირები დაესხნენ თავს, დაიღუპა ერთი და დაშავდა ოთხი პოლიციელი. აღნიშნული ბლოკპოსტი მონასტერთან მისასვლელ გზაზე, 800 მეტრის მოშორებით მდებარეობს. ტელეარხ ალ ჯაზირას ცნობით, მომხდარზე პასუხისმგებლობა უკვე აიღო ტერორისტულმა დაჯგუფებამ, ისლამურმა სახელმწიფომ.

წმ. ეკატერინეს მონასტერი მეექვსე საუკუნეშია დაარსებული და ის იუნესკოს მსოფლიო მემკვიდრეობის ნუსხაშია შეტანილი. ბოლო დღეების განმავლობაში ეს ქრისტიანებზე თავდასხმის მესამე ფაქტია. ორ აფეთქებას კაიროში, რამდენიმე დღის წინ, კოპტი ქრისტიანების ტაძარში, 45 ადამიანი ემსხვერპლა. ეგვიპტეში ათ დღეში დაგეგმილია რომის პაპის, ფრანცისკეს ვიზიტი. უსაფრთხოების ზომები მთელი ქვეყნის მასშტაბით გაძლიერებულა. რაც შეეხება სინაის ნახევარკუნძულს, აღნიშნული ადგილი ტურისტებისთვის ერთ–ერთ ყველაზე პოპულარულ მიმართულებას წარმოადგენს, მათ შორის განსაკუთრებული მნიშვნელობა აქვს სწორედ წმ. ეკატერინეს მონასტერს.