საპარლამენტო ოპოზიციის შეფასებით, დღევანდელი დღე პარლამენტის ისტორიაში სამარცხვინოა. ასე ეხმაურებიან ისინი პარლამენტის თავმჯდომარის, შალვა პაპუაშვილის განცხადებას, რომ უკრაინის საკითხზე რიგგარეშე სხდომა არ ჩატარდება. ნაციონალური მოძრაობის წევრის, ხატია დეკანოიძის თქმით, პირველად, საქართველოს ისტორიაში პარლამენტის დარბაზის კარი არ გაიღო.

"დღეს არის სირცხვილის დღე საქართველოს პარლამენტში. დღეს არის სირცხვილის დღე საქართველოს ისტორიაში და არა მარტო საპარლამენტო ცხოვრებაში, როდესაც მაშინ, როცა ამ წუთებში ერთ-ერთ ჩემს საყვარელ უბანში, კიევში, რუსული დივერსიული ჯგუფები უტევენ თავდაცვას, თავდაცვის ძალებს უკრაინაში და მათ შორის მოქალაქეებს, ვინც არიან თავდაცვაში ჩართული ქალაქის, უმრავლესობამ სრულიად სამარცხვინო გადაწყვეტილებით შეაგროვა ხელმოწერები უმრავლესობის დეპუტატების და გადაწყვიტა, რომ დღეს, საქართველოს კონსტიტუციის დარღვევით, საქართველოს პრეზიდენტის მიერ მოწვეული პარლამენტის სხდომა არ ჩაეტარებინა და არ გაეღო საქართველოს პარლამენტის დარბაზი პირველად, საქართველოს ისტორიაში", — განაცხადა ხატია დეკანოიძემ.

დეკანოიძე პარლამენტის სამარცხვინო თავმჯდომარეს უწოდებს პაპუაშვილს. მისი თქმით, ის ქვეყნის კონსტიტუციის წინააღმდეგ წავიდა და საკანონმდებლო ორგანოს კარი დაკეტა, როგორც საქართველოს მოქალაქეებისთვის, ასევე, უკრაინასა და უკრაინაში დაღუპულებისთვისაც.

"ჩვენ უნდა გაგვეჟღერებინა აქ ჰიმნი საქართველოს და უკრაინის, უნდა გვეთქვა მთელი მსოფლიოსთვის, რომ ჩვენს ოკუპირებულები ვართ, რომ უკრაინაში მიდის აგრესია, რომ ახლა ჩვენი მეგობრები უკრაინაში, ჟურნალისტები მთელი მსოფლიოდან, თქვენი კოლეგები, ჩვენი კოლეგები რადაში ისვრიან იმისთვის, რომ საკუთარი სამშობლო დაიცვან", — აღნიშნავს დეპუტატი.

საპარლამენტო ოპოზიციის წევრებმა პარლამენტში უკრაინისა და საქართველოს ჰიმნი ჩართეს.

ოპოზიციამ რიგგარეშე სხდომის გამართვის მოთხოვნით პრეზიდენტ სალომე ზურაბიშვილს გუშინ მიმართა. ზურაბიშვილმა თქვა, რომ საჭიროდ მიაჩნია ნებისმიერ ფორმატში უკრაინის სუვერენიტეტისა და ტერიტორიული მთლიანობისადმი მხარდაჭერის გამოხატვა და მოთხოვნას ხელი მოაწერა. "ოცნებაში" იმავე დღეს თქვეს, რომ სხდომას არ დაესწრებოდნენ.

დღეს, 25 თებერვალს პარლამენტის თავმჯდომარემ, შალვა პაპუაშვილმა განაცხადა, რომ პრეზიდენტის მიერ ამ მოთხოვნაზე ხელის მოწერა მხოლოდ ფორმალური უფლებამოსილების ნაწილია. პაპუაშვილის მტკიცებით, რიგგარეშე სხდომის დღის წესრიგის ორივე საკითხი რეგლამენტს ეწინააღმდეგება.

ამასთან, პარლამენტის თავმჯდომარე ირწმუნება, რომ ოპოზიციის რეალური მიზანი არა უკრაინისთვის სოლიდარობის გამოხატვა, ან საქართველოს უსაფრთხოებაზე ზრუნვა, არამედ პარლამენტში დაპირისპირების გამოწვევაა. ის დასძენს, რომ სხდომას ბევრი დეპუტატი არ ესწრება, ამიტომ რეგისტრაციის პროცედურის გამართვაც კი "აზრს მოკლებულია".

პუტინმა უკრაინაში ომი 24 თებერვალს დაიწყო, რომელსაც თავად სპეციალურ "სამხედრო ოპერაციას" უწოდებს.

იმისთვის, რომ არ გამოგრჩეთ უკრაინაში მიმდინარე პროცესებთან დაკავშირებული სიახლეები, შემოგვიერთდით ჯგუფში — რა ხდება უკრაინაში

გაიგეთ მეტი:

• რუსეთმა ომი დაიწყო, რა ხდება უკრაინაში — განახლებადი