პრეზიდენტის, სალომე ზურაბიშვილის განცხადეებით, საჭიროდ მიაჩნია ნებისმიერ ფორმატში უკრაინის სუვერენიტეტისა და ტერიტორიული მთლიანობისადმი მხარდაჭერის გამოხატვა და აპირებს, რომ რიგგარეშე სხდომის მოთხოვნას ხელი მოაწეროს.

"საჭიროდ მიმაჩნია ნებისმიერ ფორმატში ეს იქნება პარლამენტის რიგგარეშე სხდომა, თუ გაფართოებული უსაფრთხოების საბჭო, გამოვხატოთ ყველამ ერთად, რომ ვდგავართ მთელი ერი უკრაინის სუვერენიტეტისა და ტერიტორიული მთლიანობის გვერდით და მშვიდობის მხარეს.

მაცნობეს, რომ შემოვიდა რიგგარეშე სხდომის თხოვნა ჩემთან და ვაპირებ, რომ ხელი მოვაწერო. ჩემი მხრივ, მზად ვარ, რომ წარმოვადგინო საქართველო, როგორც ამის უფლებას კონსტიტუცია მაძლევს, ყველა იმ ფორმატში, სადაც მიმდინარეობს უკრაინის საკითხის განხილვა. საჭიროა საქართველოს ხმა მოისმინონ იქაც", — განაცხადა პრეზიდენტმა.

საპარლამენტო ოპოზიცია რუსეთის უკრაინაში შეჭრისა და ომის პარალელურად რიგგარეშე საპარლამენტო სხდომის მოწვევას ითხოვს. მათივე თქმით, ამავე სხდომაზე უკრაინის მხარდამჭერი რეზოლუცია უნდა იქნას მიღებული.

პარლამენტის თავმჯდომარემ, შალვა პაპუაშვილმა განაცხადა, რომ უკრაინის საკითხზე რიგგარეშე საპარლამენტო სხდომის ჩანიშვნის საჭიროებას ვერ ხედავს. მისი თქმით, დღეს ომის შეჩერება მხოლოდ საერთაშორისო მეგობრობის მკაფიო და ქმედებითი ღონისძიებებითაა შესაძლებელი.