პრემიერმინისტრის, ირაკლი ღარიბაშვილის განცხადებით, იმას, რაც პოტენციურად გააუარესებს ქვეყნის მდგომარეობას, არ გააკეთებს. ასე უპასუხა რუსთავი 2-ის ეთერში ჟურნალისტის კითხვას, ხომ არ აპირებს საქართველო სანქციებს შეუერთდეს. მისი თქმით, ყოველთვის ეროვნული ინტერესების გათავლისწინებით იმოქმედებს.

"ერთი რამ მინდა ძალიან მკაფიოდ და ნათლად ვთქვა, რომ არ იყოს სპეკულაციები და რაიმე პასუხგაუცემელი კითხვა. მე, როგორც ამ ქვეყნის პრემიერმინისტრი დღეს, მთავრობის მეთაური, რომელიც პასუხისმგებელია ქვეყნის საშინაო და საგარეო პოლიტიკაზე, ყოველთვის და ხაზს ვუსვამ ვიხელმძღვანელებ ჩვენი ქვეყნის ეროვნული ინტერესებიდან გამომდინარე.

ნებისმიერი სიტყვა, საქმე, გადაწყვეტილება, რომელიც დაკავშირებული იქნება საქართველოსთან, ჩვენი ქვეყნის გაძლიერებასა და ჩვენი მოსახლეობის ინტერესების დაცვასთან, ამ სულისკვეთებით ვიმოქმედებთ და ვიხელმძღვანელებთ. სხვა ყველაფერს, რაც პოტენციურად გააუარესებს ჩვენი ქვეყნის მდგომარეობას, ან ჩვენი მოსახლეობის ინტერესების წინააღმდეგ იმოქმედებს, რა თქმა უნდა, მე ამას არასოდეს გავაკეთებ. ეს არის ძალიან ცხადი ნათქვამი", — თქვა მან.

ღარიბაშვილი ასევე ამბობს, რომ აკვირდება დასავლეთს, თუ რა რეაგირება ექნებათ მიმდინარე პროცესებთან დაკავშირებით. მისი შეფასებით, უკრაინაში მიმდინარე მოვლენების პარალელურად, არ აქვს იმის თქმის საფუძველი, რომ საქართველოს საფრთხე ემუქრება. ღარიბაშვილის თქმით, საფრთხე რომელიც იყო, უკვე მოხდა 2008 წელს.

რუსეთის პრეზიდენტმა, ვლადიმერ პუტინმა უკრაინის ოკუპირებული ტერიტორიები თვითგამოცხადებული ლუგანსკი და დონეცკი "დამოუკიდებელ რესპუბლიკებად" აღიარა. პუტინმა ეს გადწყვეტილება უკრაინის "აგრესიით" ახსნა და გასამართლებლად არაერთი პროპაგანდისტული მესიჯი გააჯღერა. მან უკრაინის ხელისუფლებას მოუწოდა, "დროულად შეწყვიტონ სამხედრო ქმედებები", წინააღმდეგ შემთხვევაში კი "ნებისმიერ სისხლისღვრაზე" პასუხისმგებლობა მათ დააკისრა.

ამ "თხოვნით" პუტინს თვითაღიარებული რესპუბლიკების ლიდერებმა და რუსეთის დუმის დეპუტატებმა მიმართეს. პუტინის გადწყვეტილება მინსკის შეთანხმების უხეში დარღვევაა.

რუსეთს უკვე დაუწესეს სანქციებიც — განახლებადი: რუსეთისთვის დაწესებული ყველა სანქცია ერთად ანუ მსოფლიოს პასუხი პუტინს.