ფილმების სტრიმინგ პლატფორმამ, MUBI-მ, თავისი აუდიტორიისთვის თანამედროვე ქართული კინოს გასაცნობად საპრეზენტაციო ტრეილერი შექმნა. ერთწუთიან ვიდეოში, სახელწოდებით ახალი ხმები ქართულ კინოში, ბოლო წლებში გამოშვებული სხვადასხვა ფილმის კადრებია ნაჩვენები. ტრეილერი სოციალური მედიის მომხმარებლებს MUBI-ის ვებგვერდზე ამისამართებს, სადაც ყველა ამ ფილმის ნახვაა შესაძლებელი.

"როცა საბჭოთა კავშირი დაიშალა, საქართველოს მდიდარი კინემატოგრაფიული მემკვიდრეობა ქაოსში აღმოჩნდა. ეკონომიკურმა არასტაბილურობამ და სამოქალაქო ომმა კინოინდუსტრია შემოსავლის გარეშე დატოვა. რთული გზა იყო გასავლელი, რათა ისეთი კულტურა აღდგენილიყო, როგორიც ოქროს ხანაში იყო — პერიოდში, რომელმაც სერგეი ფარაჯანოვის და ოთარ იოსელიანის დონის მაესტროები გვაჩუქა, როცა მაგდანას ლურჯამ (1956) ოქროს პალმის რტო მიიღო. ბოლო ათწლეულში საერთაშორისო ასპარეზზე ახალი ქართველი კინორეჟისორები გამოჩნდნენ, რომლებმაც დიდ კინოფესტივალებზე უამრავი ჯილდო აიღეს და ოსკარის ნომინაციასაც კი გამოჰკრეს ხელი. სალომე ჯაშის გამბედავი დოკუმენტური ნამუშევრიდან თამარ შავგულიძის აღიარებულ დრამამდე (კომეტები, 2019), ფილმების ეს კოლექცია ბოლო წლებში ყველაზე გამორჩეულ ახალ ხმებს უყრის თავს. განსაკუთრებულ ყურადღებას იმსახურებენ ალექსანდრე კობერიძის (რას ვხედავთ, როდესაც ცას ვუყურებ?, 2021) და დეა ყულუმბეგაშვილის (დასაწყისი, 2020) ფილმები. ეს მრავალფეროვანი ნაკრები კი მსოფლიო კინოსამყაროში ახალი, დიდი ტალღის დაწყების მომასწავებელია", — წერს MUBI ვებგვერდზე.

აღსანიშნავია, რომ კობერიძის ფილმს გასულ წელს დიდი გამოხმაურება ხვდა წილად. კინოსურათი რას ვხედავთ, როდესაც ცას ვუყურებ? ბერლინალეზე კინოკრიტიკოსთა რჩეული გახდა, დასახელდა ფიპრესის წლის საუკეთესო ფილმის ნომინანტად, ჩიკაგოს კინოფესტივალზე კი საუკეთესო სცენარის ჯილდოც დაიმსახურა.

აღნიშვნას იმსახურებს ყულუმბეგაშვილის ფილმიც, რომელმაც უცხოელი კინოკრიტიკოსების აღიარებასთან ერთად, ტრიესტეს, იტალიური და აღმოსავლეთ ევროპის ქვეყნების კინოფესტივალების ჯილდოები მიიღო. კინოსურათი წარდგენილი იყო ევროპულ კინოდაჯილდოებაზეც.

წაიკითხეთ რეცენზია ფილმზე: