უკრაინის საგარეო საქმეთა მინისტრის, დმიტრი კულებას განცხადებით, როდესაც უკრაინელები ერთად არიან, ისინი ყოველთვის იმარჯვებენ. კულება მადლობას უხდის პარტნიორებსა და მეგობრებს, რომლებმაც მხარდაჭერა არამხოლოდ სიტყვით, საქმითაც გამოხატეს.

"ერთად უკრაინელები ყოველთვის იმარჯვებენ. დღეს ჩვენ ერთიანობის დღეს აღვნიშნავთ ყველა უკრაინელის სახლში თუ საზღვარგარეთ, თუმცა ასევე, უკრაინის ერთიანობას საიმედო პარტნიორებთან, რაც დადასტურდა რუსეთის მიერ შექმნილი უსაფრთხოების კრიზისით. მადლიერი ვართ ჩვენი ნამდვილი მეგობრების, ვინც ჩვენს გვერდით დგანან არამხოლოდ სიტყვებით, არამედ საქმითაც", — წერს მინისტრი ტვიტერზე.

უკრაინის ერთიანობის დღესთან დაკავშირებით ვოლოდმირ ზელენსკიმ მიმართვა გაავრცელა. უკრაინის პრეზიდენტმა განაცხადა, რომ არავის შეუძლია უყვარდეს უკრაინა ისე, როგორც მის მოქალაქეებს და მხოლოდ მათ შეუძლიათ დაიცვან საკუთარი ქვეყანა.

უკრაინის პრეზიდენტმა, ვოლოდიმირ ზელენსკიმ 14 თებერვალს მოსახლეობისთვის სპეციალური ვიდეომიმართვა გაავრცელა, რომელშიც მოსალოდნელ ომზე ისაუბრა. მისი განცხადებით, ეუბნებიან, რომ 16 თებერვალს დაიწყება სამხედრო ინტერვენცია, რასაც ისინი ერთობით უპასუხებენ. კერძოდ, ზელენსკიმ განაცხადა, რომ ამ დღეს უკრაინის დროშების და ცისფერ-ყვითელი ლენტების გამოფენით შეხვდებიან და მსოფლიოს მათ ერთიანობას აჩვენებენ.

11 თებერვალს ამერიკის შეერთებული შტატების სახელმწიფო მდივანმა, ენტონი ბლინკენმა განაცხადა, რომ რუსეთი უკრაინაში, შეიძლება, ნებისმიერ დროს შეიჭრას. მოგვიანებით ეროვნული უსაფრთხოების საკითხებში აშშ-ის პრეზიდენტის მრჩეველმა, ჯეიკ სალივანმა კი მოუწოდა აშშ-ის მოქალაქეებს, დაუყოვნებლივ დატოვონ უკრაინა. ამერიკის მსგავსად სხვა ქვეყნებიც მოუწოდებენ საკუთარ მოქალაქეებს დატოვონ უკრაინა.