პარლამენტმა სპეციალური საგამოძიებო სამსახურის უფროსად 6 წლის ვადით კარლო კაციტაძე აირჩია. პლენარულ სხდომაზე მის კანდიდატურას 76-მა დაუჭირა მხარი, 1 კი წინააღმდეგი იყო.

ახალი სამსახური მას შემდეგ შეიქმნა, რაც ქართულმა ოცნებამ ინსპექტორის სამსახურის გაუქმება გადაწყვიტა. ორი ახალი: პერსონალურ მონაცემთა დაცვისა და სპეციალური საგამოძიებო სამსახური პირველი თებერვლიდან ამოქმედდება. კანდიდატების შერჩევის პარალელურად არასამთავრობო სექტორი მოუწოდებდა საკონსტიტუციო სასამართლოს თოლორაიას სარჩელი პრიორიტეტულად და დროულად განეხილა. მათი განმარტებით, ეს აუცილებელი იყო, რადგან პარლამენტის მიერ დაწყებული დამაზიანებელი პროცესი შეჩერებულიყო.

გასაუბრება პარლამენტში

პარლამენტში გასაუბრების დროს, კარლო კაციტაძემ განაცხადა, რომ მისი არჩევის შემთხვევაში, ყველაფერს გააკეთებს სამსახურის პოლიტიკური ნეიტრალიტეტის და თანამშრომლების პოლიტიკური გავლენებისგან დასაცავად. ამის შემდეგ კი სწორედ დამოუკიდებლობაზე დასმული კითხვა, მისი დისკრიმინაციის მცდელობად შეაფასა. დეპუტატმა ხატია დეკანოიძემ კაციტაძეს ჰკითხა, როგორ შეძლებდა "დამოუკიდებლობის შენარჩუნებას, მისი საპროკურორო საქმიანობის გათვალისწინებით, როდესაც პოლიტიკურად მოტივირებულ სისხლის სამართლის საქმეების პროკურორი იყო".

კაციტაძემ ჩამოთვალა საქმეები და დაინტერესდა, რომელი მათგანი იყო პოლიტიკური. მან დეკანოიძეს მიმართა:

"ფოტოგრაფების საქმე იყო პოლიტიკური? კობა დავითაშვილის ცემის საქმე იყო პოლიტიკური? ალბათ, გემახსოვრებათ, როგორ გაიტაცეს ელიავას ბაზრობიდან ადეიშვილის დავალებით სპეცრაზმის თანამშრომლებმა და ფაქტობრივად მომაკვდავი გორის სამხედრო ჰოსპიტალში როგორ შეიყვანეს და გადამალეს.

აკურას ღვინის ქარხნის ჩამორთმევის საქმე იყო პოლიტიკური?! სადაც ადამიანებმა კრედიტი გამოიტანეს ბანკიდან და მერე მერაბიშვილისა და ადეიშვილის დავალებით დაიბარეს და ღვინის ქარხანა ჩამოართვეს.

2011 წლის მაისის აქციიდან გატაცებული ხალხი ყვარლის დროებითი მოთავსების იზოლატორში რომ შეიყვანეს, 15 ადამიანი, მაისურების გახდას აიძულებდნენ, არეცხინებდნენ იატაკს და მერე ამ ტალახიან მაისურებს აცმევდნენ. "კაპეზეში" მიშა მაგარიაზე რომ ამღერებდნენ, ეგ საქმე იყო პოლიტიკური?" — თქვა კაციტაძემ.

კანდიდატმა მიიჩნია, რომ შეკითხვა ემსახურებოდა არა მისი სტრატეგიის გაცნობას, არამედ მისი და თავად პროცესის დისკრედიტაციას.

"თუ ამ სამსახურმა, რომელსაც ყოფილი პროკურორები ხელმძღვანელობდნენ, დამოუკიდებლად იმუშავა და თქვენი მოწონება დაიმსახურა, მაშინ ჩემთან მიმართებით ეს ლოგიკა რატომ მუშაობს საწინააღმდეგოდ? აბა, საიდან უნდა მიდიოდეს საგამოძიებო ორგანოში თანამშრომელი?! პროკურატურაში არიან ყველაზე მაღალკვალიფიციური სისხლის სამართლის სპეციალისტები, რომელთაც აქვთ გამოცდილება საგამოძიებო მიმართულებით", — თქვა კაციტაძემ.

როდესაც სასამართლოს დამოუკიდებლობაზე საუბრობდა, არ უხსენებია არსებული ხარვეზები და საერთაშორისო კრიტიკა ამ მიმართულებით, გაიხსენა ყოფილი ხელისუფლების პერიოდი და დღევანდელი ციფრები ძველს შეადარა.

"2012 წლამდე გამამართლებელი განაჩენის მაჩვენებელი იყო 0,1 %, რაღაც თვეებში შეიძლება მაქსიმუმ 0,3%-ზე ასულიყო. როგორც მე ეს რიცხვები შევისწავლე, დღეს კი არის 9,7%, ანუ 10%-მდე და ეს იმას ნიშნავს, რომ სასამართლოში 100 საქმიდან 50-ზე საპროცესო შეთანხმება ფორმდება. ანუ ბრალდებული და პროკურატურა თანხმდებიან", — ისაუბრა მან.

ჯანაშვილის პროფესიული გამოცდილება

დოკუმენტების მიხედვით, მან 2007 წელს დაასრულა თსუ-ის იურიდიული ფაკულტეტი და მიენიჭა სამართლის ბაკალავრის აკადემიური ხარისხი. 2007 წლიდან მუშაობს საქართველოს პროკურატურაში. 2007-2012 წლებში მუშაობდა თბილისის ვაკე-საბურთალოს რაიონულ პროკურატურაში, შემდეგ შიდა ქართლისა და მცხეთა-მთიანეთის საოლქო პროკურატურაში.

2012 წლიდან საქართველოს გენერალურ პროკურატურაში მუშაობს, ანტიკორუფციულ დეპარტამენტში. 2013-2015 წლებში იკავებდა მთავარი პროკურატურის საგამოძიებო ნაწილის საპროკურორო ზედამხედველობის სამმართველსოს უფროსის პოზიციას.

კაციტაძე დღემდე გენერალური პროკურატურის სახელმწიფო ინსპექტორის სამსახურში გამოძიების საპროცესო ხელმძღვანელობის დეპარტამენტის უფროსი და სპიკერ-პროკურორი იყო.

უკვე სპეციალური საგამოძიებო სამსახურის უფროსი ფლობს ინგლისურ ენას.

• ვინ აირჩიეს პერსონალურ მონაცემთა დაცვის სამსახურის უფროსად

პარლამენტმა ქართული ოცნების ინიცირებული კანონპროექტი სახელმწიფო ინსპექტორის სამსახურის გაუქმების შესახებ დაჩქარებულად განიხილა და გასული წლის 30 დეკემბერს დაამტკიცა. კანონპროექტის მიხედვით, გაუქმდა სახელმწიფო ინსპექტორის თანამდებობა და სამსახური. მის მაგივრად კი ორი — სპეციალური საგამოძიებო და პერსონალურ მონაცემთა დაცვის სამსახურები შეიქმნა.

კანონის მიღების შეჩერება მოითხოვა ევროკავშირმა, ევროპის საბჭოს ადამიანის უფლებათა კომისარმა, გაერომ, საქართველოში აკრედიტებული დიპლომატიური კორპუსის წარმომადგენლებმა, ევროპარლამენტარებმა, ამერიკის ელჩმა. ყველა მათგანმა მიუთითა, რომ დამოუკიდებელი სახელმწიფო ინსტიტუტის დაშლა ასეთი დაჩქარებული წესით, გაუმჭვირვალედ, იყო მიუღებელი და ამ კანონის მიღება უნდა დაფუძნებოდა ფართო დისკუსიებს, ღია და ღრმა განხილვებს, მათ შორის, ამ დისკუსიებში პირველ რიგში ჩართული უნდა ყოფილიყო სახელმწიფო ინსპექტორის სამსახური, რეფორმა უნდა განხორციელებულიყო ფრთხილად და თანამდებობის პირების მიმართ მსგავსი მსუსხავი ეფექტის თავიდან არიდების გზით.

ლონდა თოლორაიას შეფასებით, ეს არის შტურმი სამსახურზე, რომელიც თავის გადაწყვეტილებებს არასოდეს არავის უთანხმებდა. მისი თქმით, მმართველ პარტიას სამსახურის გაუქმების შესახებ მათთან არანაირი კომუნიკაცია არ ჰქონია. მისივე თქმით, მაშინ, როდესაც სამშობიაროდან უწყების გაძლიერების პროექტს წერდა, პარლამენტი მისი გაუქმების შესახებ კანონპროექტს ამზადებდა.