პარაგვაის ერთ-ერთ ღარიბ რეგიონში ანტივაქსერები და "კონსერვატიული თავისუფლად მოაზროვნეები" ცალკე დასახლებაში, სახელად "მწვანე სამოთხეში" ცხოვრობენ. "მწვანე სამოთხე" 2016 წელს დაარსდა. ვებგვერდის მიხედვით, დასახლება იმ "თავისუფლად მოაზროვნე" ადამიანებს აერთიანებს, რომელთაც სურთ, მატრიცას, 5G-ს, სავალდებულო ვაქცინაციას, კოვიდრეგულაციებს, ეკონომიკურ და პოლიტიკურ რეჟიმებს თავი დააღწიონ.

პანდემიის გავრცელების ფონზე დასახლებაში მცხოვრებთა რიცხვი გაიზარდა. "მწვანე სამოთხეში" მცხოვრებთა უდიდეს ნაწილს გერმანელი, შვედი და ავსტრიელი იმიგრანტები წარმოადგენენ. "მწვანე სამოთხის" შემქმნელების თქმით, მალე მოსახლეობის რიცხვი 150-დან 3 000-მდე გაიზრდება.

"მწვანე სამოთხე" საკუთარ იუთუბარხზე ვიდეოებსაც ავრცელებს, რომლებიც პანდემიის შესახებ კონსპირაციულ თეორიებს ეძღვნება და ქადაგებს, რომ ვირუსი, რომელმაც მსოფლიოში 5 მილიონზე ადამიანი იმსხვერპლა, არ არსებობს.

"უამრავი მოხუცი მოდის. ისინი ხვდებიან, რომ მოხუცთა თავშესაფარში ვაქცინაციის შემდეგ უამრავი ადამიანი კვდება. 40 წელს გადაცილებული ადამიანები აქ თავშესაფრის საძებნელად შვილებთან ერთად მოდიან", — განუცხადა დასახლების გერმანელმა წარმომადგენელმა გამოცემა The Guardian-ს.

რეგიონში ანტივაქსერების დასახლების შექმნა განსაკუთრებით აღელვებთ პარაგვაის ჯანდაცვის სისტემის წარმომადგენლებს. ჯანდაცვის სისტემის წარმომადგენლის, ნადია რივეროსის მიხედვით, რეგიონისთვის პანდემია ისედაც დამანგრეველი აღმოჩნდა, რადგან შესაბამისი აღჭურვილობა არ აქვთ.

"არ გვინდა, ეს ყველაფერი ხელახლა გადავიტანოთ. ვფიქრობ, უცხოელები ჩვენს ქვეყანაში შემოსვლამდე უნდა აიცრან", — აცხადებს რივეროსი.

ცოტა ხნის წინ პარაგვაიში პანდემიის მესამე ტალღა დაიწყო. ახალი რეგულაციის მიხედვით, ქვეყანაში შემოსულ არარეზიდენტ უცხოელებს ვაქცინაციის დამადასტურებელი დოკუმენტის წარდგენა ევალებათ.

"მწვანე სამოთხის" წარმომადგენლები მედიისა და მსოფლიოს დაინტერესებასა და კრიტიკას მალევე გამოეხმაურნენ:

"ჩვენ ანტივაქსერები კი არ ვართ, არამედ ვფიქრობთ, რომ ყველამ თავად უნდა აირჩიოს ის, თუ რა ნივთიერებები შეჰყავთ მათ სხეულში. ყველამ თავად უნდა გამოიკვლიოს და გადაწყვიტოს, უნდათ თუ არა ვაქცინის გაკეთება", — ვკითხულობთ განცხადებაში.