"ყველა კედელი დაინგრევა" — ასეთი დევიზი აქვს კარდაშიანების ახალი შოუს მეორე ტრეილერს, რომელიც ცოტა ხნის წინ გავრცელდა და გადაცემის გამოსვლის თარიღიც შეგვატყობინა. სტრიმინგ პლატფორმა Hulu-ზე კარდაშიანების პრემიერა 14 აპრილს შედგება.

მსოფლიოს ერთ-ერთი ყველაზე ცნობილი ოჯახის შესახებ გადაღებული პოპულარული რეალითი შოუ, Keeping Up With the Kardashians, 20 სეზონის შემდეგ, 2021 წელს დასრულდა. ამ ამბიდან სულ რამდენიმე თვეში კი დადასტურდა, რომ კარდაშიანები ახალი შოუთი დაბრუნდებოდნენ.

ახალი გადაცემა კვლავაც კარდაშიან-ჯენერების ოჯახის ხუთი წევრის — კრისის, კორტნის, კიმის, ქლოის, კენდალისა და კაილის — ასევე მათ გარშემო მყოფი სხვა ადამიანების ცხოვრების შესახებ იქნება. დრამებით, დაუჯერებელი ისტორიებითა და სახალისო მომენტებით გაჯერებული გადაცემის პოპულარობა ეკრანზე გატარებული 14 წლის განმავლობაში მხოლოდ იზრდებოდა, კარდაშიანები კი ახალი შოუთიც იმავეს გამეორებას აპირებენ.

გადაცემის ახალი ეპიზოდები 14 აპრილიდან ყოველ ხუთშაბათს გამოვა.