10-11 თებერვალს საქართველოს ეროვნულ უნივერსიტეტ SEU-ში არსებული ევროპული ინტეგრაციის კვლევითი ცენტრის ორგანიზებით გაიმართება საერთაშორისო სამეცნიერო კონფერენცია: "ევროპის მწვანე შეთანხმება და მისი პოლიტიკური, სამართლებრივი და ეკონომიკური ზეგავლენა საქართველოზე".

საინტერესოა, კლიმატის და ენერგეტიკის სექტორის ამგვარ ევოლუციას რა პოტენციური გავლენა ექნება ერთი მხრივ, საქართველოს კლიმატის პოლიტიკისა და ენერგეტიკულ რეფორმაზე და მეორე მხრივ, დეკარბონიზაციის მიმართულებაზე. მით უმეტეს იმ ფონზე, როცა კლიმატ-ნეიტრალური მიზნების მიღწევა ევროკავშირისთვის სამეზობლო, სტრატეგიული ურთიერთობებისა და პოლიტიკური დიალოგის წამყვან კომპონენტად გვევლინება.

ირაკლი სამხარაძე, SEU-ს ასოცირებული პროფესორი, სამართლის დოქტორი საუბრობს SEU-ს საერთაშორისო კონფერენციის მნიშვნელობაზე:

"2019 წლის დეკემბერში ევროპამ შეიმუშავა მნიშვნელოვანი, შეიძლება ითქვას, ახალი ამბიციური განაცხადი, ახალი სტრატეგია სახელწოდებით: "ევროპის მწვანე შეთანხმება". ევროპის მწვანე შეთანხმება მნიშვნელობით დაახლოებით მეორე ინდუსტრიული რევოლუციის სტანდარტებზე დგას, რაც გულისხმობს იმას, რომ ევროკავშირმა წარმოადგინა დეკარბონიზაციის უახლესი გეგმა და თქვა, რომ 2050 წელს იქნება კლიმატ-ნეიტრალური ანუ ნახშირბად-ნეიტრალური, რომელიც მიზნად ისახავს კონტინენტის გარდაქმნას სამართლიან, თანამედროვე რესურსების მიმართ ეფექტურ და კონკურენტული ეკონომიკის მქონე საზოგადოებად. მნიშვნელოვანია, რომ ეს ამბიცია ერთბაშად არ აღმოცენებულა. იგი ევროკავშირის კლიმატის ცვლილების წინააღმდეგ ბრძოლის მრავალწლიანი თანმიმდევრული პოლიტიკის შედეგია, რათა დედამიწაზე საშუალო ტემპერატურის მატებამ პრეინდუსტრიულ პერიოდთან შედარებით ორ გრადუსს არ გადააჭარბოს და სასურველ ზღვრულ ნიშნულად 1,5-გრადუსიანი ზრდა შეინარჩუნოს. მწვანე შეთანხმება არის ამ დიამეტრალური გარდაქმნის ბოლო ეტაპი და მნიშვნელოვანია, რომ ამაზე დისკუსიები მიმდინარეობდეს, როგორც პოლიტიკურ და დიპლომატიურ დონეზე, ისე აკადემიურ სივრცეში".

მაინც რატომ შეირჩა კონკრეტულად ეს თემა კონფერენციისთვის? ამ კითხვაზე პასუხს პროფესორი, დოქტორი, SEU-ს ვიცე-რექტორი სამეცნიერო-კვლევითი მიმართულებით, ანა ფირცხალაშვილი გასცემს:

"ეს არის უაღრესად აქტუალური საკითხი ევროპაში და ფინანსური ინსტრუმენტები თუ ყველა სხვა პოლიტიკის დოკუმენტები ორიენტირებულია ამ ახალ შეთანხმებაზე. მნიშვნელოვანია იმის გააზრება, რომ მას ექნება პირდაპირი გავლენა სამეზობლო ტერიტორიებზე, მათ შორის საქართველოზეც, იმიტომ რომ ჩვენ ვართ ევროპის სამეზობლო პოლიტიკის ნაწილი. ასევე, აღმოსავლეთ პარტნიორობის შემადგენელი ერთ-ერთი სახელმწიფო, შესაბამისად მწვანე შეთანხმებას ექნება ძლიერი, მინიმუმ იდეოლოგიური გავლენა ჩვენზე. ამიტომ, მნიშვნელოვანია, რომ აქედანვე დავიწყოთ აკადემიურ სივრცეში, აკადემიურ დისკურსში შევიტანოთ ეს პროცესები და მას მოჰყვეს შესაბამისი რეაგირება. სეუ-ს კონფერენცია არის პირველი ნაბიჯი, როდესაც ევროპის მწვანე შეთანხმების მნიშვნელოვანი ამბიცია და პროცესი შედის აკადემიურ დისკურსში. აქამდე, საქართველოში აკადემიური/სამეცნიერო დისკუსიები ამ მიმართულებით არ განხორციელებულა".

ვინ არიან მომხსენებლები?

კონფერენციის მომხსენებლები არიან ცნობილი ევროპელი და ქართველი ექსპერტები:

• პროფესორი კურტ დეკეტელაერე — ევროპის უნივერსიტეტების ლიგის (LERU) გენერალური მდივანი და ბრიუგეს მდგრადი განვითარების კოლეჯის დირექტორი.
• დოქტ. მატეო ფერმეგლია — ბელგიის ჰაზელტის უნივერსიტეტის (UHasselt) გარემოს დაცვისა და ადმინისტრაციული სამართლის მკვლევარი.
• მარკუს კერბერი — ცნობილი გერმანელი ექსპერტი, ევროპოლისის ხელმძღვანელი, ბერლინის ტექნიკური უნივერსიტეტის პროფესორი.
• კონფერენციაში აქტიურად მონაწილეობენ პოლონეთიდან ლაზარსკის უნივერსიტეტის პროფესორები: მარტინ დალი, კაროლ ჟენე, ანასტასია მენშიკოვა, ირინა ბურჩენკო და სხვები.
• ასევე, სფეროს ქართველი მკვლევრები, როგორებიც არიან SEU-ს პროფესორი და ევროპული ინტეგრაციის კვლევითი ცენტრის ხელძღვანელი ირაკლი სამხარაძე, კიოლნის უნივერსიტეტის მკვლევარი ქეთევან ვარდოსანიძე და სხვები.

კონფერენციაზე წარმოდგენილია, მრავალფეროვანი მოხსენებები ევროპის მწვანე შეთანხმების პოლიტიკური, სამართლებრივი და ეკონომიკური ზეგავლენის შესახებ.

კონფერენციაზე დასწრება თავისუფალია, მსურველებს შეუძლიათ გაიარონ რეგისტრაცია და დაესწრონ კონფერენციას ZOOM-ის პლატფორმის საშუალებით.