აშშ-ის პრეზიდენტის, ჯო ბაიდენის განცხადებით, რუსეთის უკრაინაში შეჭრის შემთხვევაში გაზსადენი Nord Stream 2 შეჩერდება. მან გერმანიის კანცლერთან, ოლაფ შოლცთან შეხვედრის შემდეგ, დასავლეთში ომის თავიდან აცილებისთვის გერმანიასთან ერთიანობას გაუსვა ხაზი.

"თუ რუსეთი შეიჭრება, ეს ნიშნავს, რომ ტანკები ან სამხედროები კვლავ გადაკვეთენ უკრაინის საზღვარს, მაშინ Nord Stream 2 აღარ იქნება. ჩვენ ამას დავასრულებთ", — განაცხადა მან.

Reuters-ის ცნობით, დამაზუსტებელ კითხვას, თუ როგორ გააკეთებს ამას, ბაიდენმა უპასუხა:

"გპირდებით, ჩვენ ამას შევძლებთ".

რაც შეეხება შოლცს, მან ხაზი გაუსვა, რომ უკრაინასთან, რუსეთსა და სანქციებთან მიმართებაში აშშ-ის მსგავსი მიდგომა აქვთ, თუმცა პირდაპირ არ დაუდასტურებია Nord Stream 2-თან დაკავშირებული გეგმები.

7 თებერვალს, გერმანელი და ამერიკელი ლიდერების შეხვედრის პარალელურად, მოსკოვში პირისპირს ისაუბრეს საფრანგეთისა და რუსეთის პრეზიდენტებმა. "მოგწონს, არ მოგწონს, მოითმინე, ჩემო ლამაზო " — ასე მიმართა ვლადიმერ პუტინმა უკრაინის პრეზიდენტს. პუტინმა ეს გამოთქმა, რომელიც სავარდოდ რუსული შაირიდანაა და იძულებას გულისხმობს, ირონიულ კონტექსტში გამოიყენა, როცა მინსკის შეთანხმებაზე საუბრობდა.

შეხვედრის შემდეგ, ისაუბრა ემანუელ მაკრონმაც და ხაზი გაუსვა, რომ ვოლოდიმირ ზელენსკი იმ ქვეყნის პრეზიდენტია, რომლის საზღვართანაც 125 000 რუსი ჯარისკაცი დგას და "დიახ, ის ნერვიულობს".

გასული კვირის განმავლობაში საფრანგეთის პრეზიდენტს სატელეფონო საუბრები ჰქონდა რუსეთისა და უკრაინის ლიდერებთან — 8 თებერვალს, სამშაბათს კი ის კიევში ჩავა. მისი თქმით, ზელენსკისთან შეხვედრის შემდეგ პუტინთან სატელეფონო საუბარი ექნება.

26 იანვარს რუსეთმა ბელარუსში სამხედრო ძალები განათავსა, რითიც უკრაინის ჩრდილოეთით შეიქმნა ახალი სავარაუდო ფრონტი თავდასხმისთვის. ამის ფონზე რუსეთი ამტკიცებს, რომ უკრაინაში შეჭრას არ გეგმავს, ამავდროულად კი დასავლეთი მკაცრი ეკონომიკური სანქციებით იმუქრება. ბოლო ინფორმაციით, რუსეთს უკრაინის საზღვრებთან 100 ათასამდე სამხედრო ჰყავს მობილიზებული.

3 თებერვალს ამერიკის შეერთებულმა შტატებმა განაცხადა, რომ რუსეთი შეჭრის საბაბად ყალბი ვიდეოს დამზადებას გეგმავდა, სადაც ნაჩვენები იქნებოდა უკრაინელების თავდასხმა რუსეთის ტერიტორიაზე ან რუს სეპარატისტებზე. აშშ-ს ცნობით, ერთ-ერთი ვარიანტი, რომელსაც კრემლი განიხილავს, არის თავდასხმის ინსცენირება და გადაღება, მათ შორის, აფეთქებებისა და მსხვერპლის გამოსახულებები.

ამასთან, როგორც ევროკომისიის ხელმძღვანელმა, ურსულა ფონ დერ ლაიენმა 4 თებერვალს თქვა, თუ რუსეთი უკრაინის მიმართ აგრესიას გააგრძელებს, ევროკავშირს რუსეთის წინააღმდეგ სანქციები აქვს მზად.

გაიგე მეტი: