ჯორჯიან ეარვეისი განცხადებას ავრცელებს და წერს, რომ კომპანიის გაკოტრებასთან დაკავშირებით გავრცელებული ინფორმაცია სიმართლეს არ შეესაბამება. ავიაკომპანიის განცხადებაში წერია, რომ ჯორჯიან ეარვეისი გადავიდა რეაბილიტაციის და არა გაკოტრების ეტაპზე, რაც ნიშნავს იმას, რომ ავიაკომპანია უწყვეტ რეჟიმში განაგრძობს მუშაობას.

"ბოლო დროს, სხვადასხვა მედიის საშუალებით გავრცელებული ინფორმაციის თანახმად, რომელიც გაჟღერდა ჯორჯიან ეარვეისის გაკოტრებასთან დაკავშირებით, არ შეესაბამება სიმართლეს. ჯორჯიან ეარვეისი გადავიდა რეაბილიტაციის და არა გაკოტრების ეტაპზე, რაც ნიშნავს იმას, რომ ავიაკომპანია უწყვეტ რეჟიმში განაგრძობს მუშაობას და რეგულარული ავიარეისების შესრულებას. ამ ეტაპზე კომერციული ფრენები ხორციელდება თელ ავივის, ამსტერდამისა და ვენის მიმართულებით", — ნათქვამია ავიაკომპანიის განცხადებაში.

გადახდისუუნარობის გამო რეაბილიტაციის რეჟიმის გახსნის თხოვნით ჯორჯიან ეარვეისმა თბილისის საქალაქო სასამართლოს გასული წლის 22 დეკემბერს მიმართა. სასამართლომ კომპანიის განცხადება დასაშვებად ცნო და მის მიმართ რეაბილიტაციის რეჟიმი გახსნა, რაც კრედიტორებისთვის დავალიანების დაფარვის მიზნით რეაბილიტაციის გეგმის დამტკიცებას ითვალისწინებს.

განჩინების მიხედვით, კომპანიის დავალიანება 175 854 075 ლარია, ხოლო აქტივების საერთო ღირებულება 21 378 262 ლარი. დოკუმენტიდან ირკვევა, რომ შპს ჯორჯიან ეარვეისს ვალდებულებები 70-ზე მეტ სააგენტოს, მიმწოდებლების და 16 168 მგზავრის წინაშე აქვს.

მიმდინარე წლის დასაწყისში გავრცელდა ინფორმაცია, რომ ავიაკომპანია იყიდება. შესაბამისი განაცხადი საბროკერო კომპანიის, business-brokerage-ის ვებგვერდზე გამოქვეყნდა. როგორც განცხადებიდან ირკვევა, კომპანია 150 მლნ დოლარად იყიდება.

ამჟამად ჯორჯიან ეარვეისის 20%-ის მფლობელი შეზღუდული პასუხისმგებლობის საზოგადოება ჯორჯიან ეარ სერვისია, 80%-ის მფლობელი და გენერალური დირექოტორი კი დავით გაიაშვილი.