განათლების სამინისტროს ინფორმაციით, ქვეყნის მასშტაბით არსებული 2085 საჯარო და 217 კერძო სკოლიდან სრულად დისტანციურ სწავლებაზე 672 სკოლაა გადასული. უწყების ცნობით, დისტანციურ რეჟიმზე გადასვლის სურვილი რისკჯგუფის 146-მა მასწავლებელმა გამოთქვა.

მათივე ინფორმაციით, ბოლო კვირის განმავლობაში კორონავირუსი მასწავლებლების 5,8%-ს და მოსწავლეების 2,1%-ს დაუდასტურდა. რაც შეეხება ვაქცინაციას, განათლების სამინისტროში ამბობენ, რომ ამ დროისთვის მასწავლებელთა და სკოლის ადმინისტრაციის წარმომადგენელთა 73,6%-ია აცრილი.

"როგორც ცნობილია, ეპიდემიოლოგიური ვითარების გათვალისწინებით, საქართველოს განათლებისა და მეცნიერების მინისტრის, მიხეილ ჩხენკელის გადაწყვეტილებით, მოსწავლეთა მშობლებს შესაძლებლობა აქვთ, არჩევანი გააკეთონ დასწრებითი და დისტანციური სწავლების ფორმას შორის. შესაბამისად, საქართველოს მასშტაბით სასწავლო პროცესი სკოლებში შერეული ფორმატით უწყვეტად მიმდინარეობს", — ნათქვამია უწყების განცხადებაში.