რუსი ოპოზიციონერი, დმიტრი გუდკოვი პარლამენტის საგარეო საგარეო ურთიერთობათა კომიტეტის თავმჯდომარის განცხადებას ეხმაურება იმ მიზეზებთან დაკავშირებით, რის გამოც ის ქვეყანაში არ შემოუშვეს და აცხადებს, რომ ის პატივს სცემს საქართველოს ტერიტორიულ მთლიანობას გავრილოვისა და მისი პარტიის დეპუტატებისგან განსხვავებით.

"საქართველოს მთავრობა დიდი ხანი ფიქრობდა, როგორ აეხსნათ, რატომ არ შეიძლებოდა, რომ ხინკალი მეჭამა და მშვიდობის ხიდისთვის მეყურებინა. საბოლოოდ მოიფიქრეს, ვციტირებ ნიკოლოზ სამხარაძეს, პარლამენტის საგარეო ურთიერთობათა კომიტეტის თავმჯდომარეს, მე არ შემომიშვეს, რადგან:

1. მე ვიყავი რუსეთის დუმის დეპუტატი, რომელმაც აფხაზეთისა და ცხინვალის დამოუკიდებლობა აღიარა;

2. ნავალნიმ შეურაცხყოფა მიაყენა საქართველოს 2008 წელს.

ვპასუხობ.

აფხაზეთის დამოუკიდებლობა დუმამ აღიარა 2008 წელს, მე დეპუტატი გავხდი 2011 წელს. 2008 წლიდან, როდესაც საქართველოში მიიღეს კანონი ოკუპირებული ტერიტორიების შესახებ, არც აფხაზეთში და არც სამხრეთ ოსეთში არცერთხელ არ ვყოფილვარ, რადგან პატივს ვცემ საქართველოს ტერიტორიულ მთლიანობას.

გარდა ამისა, დუმის დეპუტატი გავრილოვისა და მისი პარტიის დეპუტატებისგან განსხვავებით, რომლებიც მხარს უჭერენ აფხაზეთისა და სამხრეთ ოსეთის დამოუკიდებლობას, მე არ ჩავმჯდარვარ საქართველოს პარლამენტის სპიკერის სავარძელში — როგორც გვახსოვს, საქართველოს მთავრობას ამ დეპუტატის ვიზიტი ძალიან გაუხარდა.

2. მე მქვია დმიტრი გუდკოვი და არა ალექსეი ნავალნი.

მესმის, რომ საქართველოს მთავრობას ძალიან უნდა, რომ ასიამოვნოს პუტინს. სააკაშვილის დაჭერა არაა საკმარისი, საჭიროა გააკეთოს სხვა რიტუალური ჟესტები, რომ მიიღონ ფინანსური მხარდაჭერა მომავალი არჩევნებისთვის, მაგრამ ხომ შეიძლება ტყუილი მაინც ისწავლონ ისე, რომ სასაცილოდ არ ჟღერდეს?

ვუსვამ კითხვას სამხარაძეს — ლიუბოვ სობოლიც დუმის დეპუტატი იყო? იგორ კოჩეტკოვსაც ნავალნი ჰქვია? შეგახსენებთ, რომ არც ისინი არ შემოუშვეს საქართველოში და დამთხვევაა? ალბათ!

დაბოლოს, საუბარი რომ მიდიოდეს აფხაზეთზე, ქვეყანაში შემოსვლისას უარში ამასაც დამიწერდნენ, ამისთვის არსებობს კანონის სპეციალური პუნქტი, მაგრამ მე მიმითითეს "სხვა მიზეზები" და სწორედ მათი მოფიქრება დაავიწყდათ.

დაბოლოს, მე პატივს ვცემ:

• საქართველოს ტერიტორიულ მთლიანობას;
• ქართველ ხალხს;
• მათ სვლას ევროპისკენ.

მე მეზიზღება:

• პუტინის კეთილგანწყობის მოპოვების სურვილი;
• ტყუილი.

ორივე ქვეყანა აუცილებლად იქნება თავისუფალი და დემოკრატიული", — წერს ის ფეისბუქგვერდზე.

დღეს, 3 თებერვალს საგარეო ურთიერთობათა კომიტეტის თავმჯდომარემ, ნიკოლოზ სამხარაძემ გუდკოვის ქვეყანაში არშემოშვებასთან დაკავშირებით განაცხადა, რომ ის იყო იმ დუმის წევრი, რომელმაც აფხაზეთისა და ცხინვალის რეგიონის დამოუკიდებლობა აღიარა.

"ის მანამდე იყო დუმის წევრი, იმ დუმისა, რომელმაც აფხაზეთისა და ცხინვალის რეგიონის დამოუკიდებლობა აღიარა, ამიტომ ვერ ვხედავ მე აქ აჟიოტაჟის საფუძველს. აქვე შემიძლია ვთქვა, ის, რომ ნავალნის მომხრე ოპოზიციონერების ქვეყანაში შემოშვება-არშემოშვებაზე როდესაც არის ხოლმე საუბარი, მე მინდა გაგახსენოშ 2008 წელს ნავალნიმ რა უწოდა ქართველებს. ამის შემდეგ მის დამოკიდებულებაზე საქართველოსთან მიმართებაში შეგვიძლია ვიმსჯელოთ", — თქვა სამხარაძემ.

დმიტრი გუდკოვმა 31 იანვარს განაცხადა, რომ საქართველოში არ შემოუშვეს. მისი თქმით, უკრაინიდან თბილისში აქტივისტებთან შესახვედრად ჩამოფრინდა და დეპორტაციის გადაწყვეტილებას პოლიტიკურს უწოდა.