ნიდერლანდების საპორტო ქალაქ როტერდამში ისტორიულ ხიდს ნაწილობრივ დაშლიან, რათა Amazon-ის დამფუძნებლისა და მსოფლიოს ერთ-ერთი უმდიდრესი ადამიანის, ჯეფ ბეზოსისათვის, აგებულმა სუპერიახტამ გავლა შეძლოს. ინფორმაციას ადგილობრივი ხელისუფლების წარმომადგენლები ავრცელებენ.

ბეზოსის გიგანტური, $485 მილიონად ღირებული იახტა, როგორც ჩანს, მეტისმეტად დიდი აღმოჩნდა, რათა კიონინგსჰაფენის ხიდის ქვეშ გაეცურა. ხიდი თავდაპირველად 1878 წელს აიგო, თუმცა, მეორე მსოფლიო ომის დროს დაიბომბა და მას შემდეგ ხელახლა აშენდა.

ბეზოსისათვის ხომალდი როტერდამის მახლობლად, ალბლასერდამში, აიგო. კომპანიამ, რომელმაც სუპერიახტა ააგო, ქალაქის საბჭოს სთხოვა, ორსაუკუნოვანი ისტორიის მქონე ხიდი ნაწილობრივ დაშლილიყო, რათა გემმა გაცურვა შეძლოს.

"ზღვაზე გასასვლელად ეს ერთადერთი გზაა", — აცხადებს როტერდამის მერიის წარმომადგენელი და დასძენს, რომ ხიდის დაშლის ხარჯებს Amazon-ის დამფუძნებელი დაფარავს.

ამის მიუხედავად, გადაწყვეტილებამ ნიდერლანდებში ზოგიერთი მოქალაქე გააღიზიანა, რადგან 2017 წელს, ხიდის მასშტაბური განახლების შემდეგ, ქალაქის საბჭომ პირობა დადო, რომ ნაგებობა აღარასდროს დაიშლებოდა.

ამ რეაქციის საპასუხოდ როტერდამის მერიამ ხომალდის ასაგებად გამოყოფილი სამუშაო ადგილებისა და ეკონომიკური სარგებლის მნიშვნელობას გაუსვა ხაზი და ქალაქის მცხოვრებლებს დაჰპირდა, რომ ხიდი ძველებურ ფორმას დაუბრუნდება.

ნიდერლანდური მედიის ცნობით, 40 მეტრი სიმაღლის მქონე გემისთვის გზის დასათმობად ხიდის ფოლადით აგებული შუა ნაწილი დაიშლება. ამ პროცესს, რომელიც ზაფხულისთვის იგეგმება, რამდენიმე კვირა დასჭირდება.

ასევე იხილეთ: