იაშვილის სახელობის ბავშვთა ცენტრალური საავადმყოფოს სამედიცინო დირექტორის, ივანე ჩხაიძის განცხადებით, მწვანე პასპორტის გაუქმებამ შესაძლებელია, რომ ქვეყანაში კორონავირუსით ინფიცირების ზრდას შეუწყოს ხელი.

"მწვანე პასპორტების მთლიანად გაუქმება და ამოღება საქართველოსთვის გარკვეულ რისკებთან არის დაკავშირებული და ეს რისკები არის, რა თქმა უნდა, ისევ და ისევ უსაფრთხოების ნაკლები განცდა. როდესაც თქვენ დახურულ სივრცეში ხართ და დახურული სივრცე მწვანე პასპორტის აუცილებლობას გულისხმობდა, ახლა ამ მექანიზმის მოხსნის შემდეგ დახურულ სივრცეში ინფექციის გაზრდის რისკი, რა თქმა უნდა, იქნება უფრო მეტი [...] სავსებით შესაძლებელია, მწვანე პასპორტების მთლიანად გაუქმებამ, გაურკვეულწილად ინფიცირების ზრდასაც შეუწყოს ხელი", — განაცხადა მან.

ჩხაიძე ამბობს, რომ ზოგიერთი ადამიანისთვის, ვისაც ჯერ კიდევ ჰქონდა აცრის სურვილი, მწვანე პასპორტის გაუქმება აუცილებლად გახდება დემოტივატორი, რადგან ამ მექანიზმის მიზანი სწორედ ვაქცინაციის ხელშეწყობა იყო.

საქართველოში მწვანე პასპორტი გაუქმებაზე გადაწყვეტილება გუშინ, პირველ თებერვალს გამოცხადდა. საკოორდინაციო საბჭოსთან არსებული ოპერაციული შტაბის უფროსის, გიორგი ღიბრაძის განცხადებით, მოქალაქეებს ქვეყანაში მწვანე პასპორტის წარდგენის ვალდებულება აღარ ექნებათ, მაგრამ ბაზა დარჩება იმისთვის, რომ მწვანე სტატუსი ქვეყნის გარეთ გამოიყენონ.

საქართველოში მწვანე პასპორტები პირველ დეკემბერს გამოჩნდა. ქვეყანაში 2 აპლიკაცია მუშაობდა მწვანე პასპორტის ასაღებად და შესაბამისად, ორი ტიპის მწვანე საშვი გვქონდა. ერთს ევროკავშირი აღიარებდა და ამ აპლიკაციით მწვანე პასპორტს ვერ იღებდნენ ისინი, ვინც კორონავირუსი 6 თვეზე მეტი ხნის წინ გადაიტანა. სწორედ ამიტომ შეიქმნა მეორე აპლიკაცია, სადაც იმ პირების კოდებიც ჩანდა, ვისაც კორონავირუსი დიდი ხნის წინ ჰქონდა გადატანილი.

ე.წ. უვადო მწვანე პასპორტი კორონაგადატანილებისთვის სამედიცინო სფეროს წარმომადგენლების მხრიდან კრიტიკის საგანი მაშინვე გახდა.