ნატოს გენერალურმა მდივანმა, იენსს სტოლტენბერგმა და აშშ–ს პრეზიდენტმა, დონალდ ტრამპმა თეთრ სახლში ერთობლივი პრესკონფერენცია გამართეს, სადაც ნატოს მნიშვნელობაზე, ასევე მისი დაფინანსების გაზრდის აუცილებლობაზე ისაუბრეს.

სტოლტენბერგის თქმით, ცივი ომის დასრულების შემდეგ იყო ქვეყნების მიერ თავდაცვის ბიუჯეტის შემცირების ტენდენცია, ახლა კი სახელმწიფოები პირიქით, ზრდიან თავდაცვის დაფინანსებას. მისი თქმით, თავდაცვის დაფინანსების გაზრდა ნატოს წევრთა უსაფრთხოების ინტერესში შედის:

"თუკი შენ ნაკლებს ხარჯავ თავდაცვაზე როდესაც დაძაბულობა მცირდება, მაშინ შენ მზად უნდა იყო, რომ გაზარდო ბიუჯეტი, როდესაც დაძაბულობა იზრდება. და ახლა დაძაბულობა გაზრდილია."

ტრამპმა და სტოლტენბერგმა თქვეს, რომ ნატოს წევრებმა თავდაცვის დაფინანსება მთლიანი შიდა პროდუქტის ორ პროცენტამდე უნდა გაზარდონ, რათა თანაბრად მიიღონ მონაწილეობა უსაფრთხოების გამტკიცებაში.

სტოლტენბერგმა მადლობა გადაუხადა აშშ–ს ნატოს გვერდში დგომისთვის. მან ყურადღება გაამახვილა ევროპის აღმოსავლეთ საზღვრის გაძლიერების მნიშვნელობაზე. კერძოდ, 2016 წლის ივლისში ნატომ ლიტვაში, ლატვიაში, ესტონეთსა და პოლონეთში ოთხი ბატალიონი განათავსა. ნატოს გენერალური მდივნის თქმით, ეს იყო ცივი ომის შემდეგ უპრეცენდენტო ნაბიჯი, რადგან მას შემდეგ პირველად გახდა საჭირო ევროპის აღმოსავლეთ საზღვრის გაძლიერება. მისივე განმარტებით, ეს არის "თავდაცვითი ღონისძიება."

ტრამპმა და სტოლტენბერგმა ასევე ისაუბრეს სირიაში შექმნილ კრიზისზე. როგორც აშშ-ს პრეზიდენტი ამბობს, ქიმიური იარაღის გამოყენება ასადის რეჟიმის მიერ, რასაც უდანაშაულო მოსახლეობა ემსხვერპლა, უპასუხოდ არ უნდა დარჩეს. მან მადლობა გადაუხადა ყველა პარტნიორს, რომელმაც მხარი დაუჭირა აშშ-ს საჰაერო იერიშებს სირიის სამთავრობო ძალების წინააღმდეგ.

დღევანდელი პრესკონფერენციის ერთ-ერთი მნიშვნელოვანი დეტალი იყო ისიც, რომ ტრამპმა ნატოე ნათქვამი ფრაზა, რომ ეს ალიანსი მოძველებულია, უკან წაიღო:

"მე ვთქვი, რომ ნატო მოძველებულია. თუმცა, ის უკვე აღარ არის მოძველებული".

სტოლტენბერგ-ტრამპის ერთობლივი პრესკონფერენცია დაახლოებით 40 წუთს გაგრძელდა.