ამერიკის შეერთებული შტატების სახელმწიფო მდივანი, რექს ტილერსონი რუსეთის დედაქალაქში იმყოფება. თავდაპირველად დაგეგმილი იყო ტილერსონისა და რუსეთის საგარეო საქმეთა მინისტრის, სერგეი ლავროვის შეხვედრა, თუმცა როგორც გაირკვა, ტილერსონს მოსკოვში რუსეთის პრეზიდენტი, ვლადიმერ პუტინიც შეხვდა.

ეს არის ორი ქვეყნის მაღალი თანამდებობის პირების პირველი შეხვედრა მას შემდეგ, რაც სირიაში რუსეთის მიერ მხარდაჭერილმა ასადმა მოსახლეობის წინააღმდეგ, სავარაუდოდ, ქიმიური იარაღი გამოიყენა, რის გამოც სირიული სამხედრო ავიაბაზა აშშ–მ დაბომბა.

ჯერჯერობით, შეხვედრის დასრულების შემდეგ არ გამართულა პრესკონფერენცია. მოსკოვი მსოფლიო მედიის ყურადღების ცენტრშია, რადგან არსებობს მოლოდინი, რომ მხარეები სირიასთან დაკავშირებით მნიშვნელოვან პოზიციებს გამოხატავენ.

სირიის სამთავრობო ძალებზე ავიაიერიშის მიტანის გამო რუსეთმა ამერიკის შეერთებული შტატები გააკრიტიკა.

სირიაში მიმდინარე სამოქალაქო ომის დაწყებიდან ექვსი წლის შემდეგ, ამერიკის შეერთებული შტატების ხელისუფლებამ, 7 აპრილს, პირველი პირდაპირი იერიში მიიტანა სირიის სამთავრობო ძალების პოზიციებზე. როგორც პრეზიდენტმა ტრამპმა განაცხადა, ამის მიზეზი გახდა სირიის ხელისუფლების მიერ რამდენიმე დღის წინ საკუთარი მოქალაქეების მიმართ, აჯანყებულთა კონტროლირებად ტერიტორიაზე, ქიმიური იარაღის გამოყენება. იდლიბის პროვინციაში, კვირის დასაწყისში, ავიაიერიშებს, სადაც, სავარაუდოდ გამოიყენეს ქიმიური ბომბები, მომწამვლელ გაზს ათეულობით ადამიანი ემსხვერპლა, მათ შორის არიან ბავშვები.

ტრამპის აღნიშნული გადაწყვეტილება მნიშვნელოვანია რამდენიმე მიზეზის გამო. პირველი ეხება მის საგარეო კურსს. ის მუდამ აცხადებდა, რომ აშშ არ უნდა ჩაერიოს სამხედრო ძალით სხვა ქვეყნის კონფლიქტებში. მეორე მნიშვნელოვანი ფაქტორი კი რუსეთია.

სწორედ რუსეთის ფედერაცია უმაგრებს ზურგს ასადის რეჟიმს და ეხმარება მას პირდაპირი სამხედრო ძალით აჯანყებულების წინააღმდეგ საბრძოლველად. რუსულმა ავიაციამ არაერთხელ დაბომბა სირიელი აჯანყებულთა პოზიციები.

სირიაში უკვე ექვსი წელია სამოქალაქო ომი მიმდინარეობს, სადაც საერთაშორისო აქტორებიც არიან ჩართულები.