რუსეთის პრეზიდენტის პრესსპიკერმა, დიმიტრი პესკოვმა რუსულ მედიას უთხრა, რომ ვლადიმერ პუტინი ამერიკის შეერთებული შტატების მიერ სირიის მთავრობის სამხედრო ბაზაზე ავიაიერიში, "სუვერენული სახელმწიფოს წინააღმდეგ აგრესიად" აფასებს.

რუსეთის პრეზიდენტისვე მოსაზრებით, სირიის მთავრობა ქიმიური იარაღის მარაგებს არ ფლობს და ეს გაეროს ზედამხედველებმაც დაადასტურეს, თუმცა, აშშ ამას ყურადღებას არ აქცევს.

"აშშ ასევე არ აქცევს ყურადღებას ტერორისტების მიერ ქიმიური იარაღის გამოყენების ფაქტებს, რაც ართულებს სიტუაციას", – მიიჩნევს რუსეთის პრეზიდენტი.

სირიაში მიმდინარე სამოქალაქო ომის დაწყებიდან ექვსი წლის შემდეგ, ამერიკის შეერთებული შტატების ხელისუფლებამ, 7 აპრილს, პირველი პირდაპირი იერიში მიიტანა სირიის სამთავრობო ძალების პოზიციებზე. როგორც პრეზიდენტმა ტრამპმა განაცხადა, ამის მიზეზი გახდა სირიის ხელისუფლების მიერ რამდენიმე დღის წინ საკუთარი მოქალაქეების მიმართ, აჯანყებულთა კონტროლირებად ტერიტორიაზე, ქიმიური იარაღის გამოყენება. იდლიბის პროვინციაში, კვირის დასაწყისში, ავიაიერიშებს, სადაც, სავარაუდოდ გამოიყენეს ქიმიური ბომბები, მომწამვლელ გაზს ათეულობით ადამიანი ემსხვერპლა, მათ შორის არიან ბავშვები.

ტრამპის აღიშნული გადაწყვეტილება მნიშვნელოვანია რამდენიმე მიზეზის გამო. პირველი ეხება მის საგარეო კურსს. ის მუდამ აცხადებდა, რომ აშშ არ უნდა ჩაერიოს სამხედრო ძალით სხვა ქვეყნის კონფლიქტებში. მეორე მნიშვნელოვანი ფაქტორი კი რუსეთია.

სწორედ რუსეთის ფედერაცია უმაგრებს ზურგს ასადის რეჟიმს და ეხმარება მას პირდაპირი სამხედრო ძალით აჯანყებულების წინააღმდეგ საბრძოლველად. რუსულმა ავიაციამ არაერთხელ დაბომბა სირიელი აჯანყებულთა პოზიციები.

სირიაში უკვე ექვსი წელია სამოქალაქო ომი მიმდინარეობს, სადაც საერთაშორისო აქტორებიც არიან ჩართულები.