მომავალ წელს ჯეფ ბეზოსის Blue Origin პირველ ტურისტულ გაფრენას გეგმავს.

New Shepard კოსმოსური კაფსულაა, რომელიც მგზავრებს ქვეორბიტალურ მოგზაურობაში წაიყვანს. ეს გაფრენა სულ რაღაც 40 - 45 წუთი გაგრძელდება და ამ დროს თუ ვინმეს ტუალეტში მოუნდება, თავის თავს უნდა დააბრალოს.

ჯერ ერთი, უწონადობის პირობებში ფიზიოლოგიური მოთხოვნილებების დაკმაყოფილება არც ისე ადვილია. მეორეც, ამ ისედაც მცირე დროის ტუალეტში დახარჯვა ძალიან ცუდი იდეაა და არ ღირს, ხოლო ყველაფერს რომ თავი დავანებოთ, კაფსულაში საერთოდ არ იქნება საპირფარეშო.

კოლორადო სპრინგსში, 33-ე კოსმოსურ სიმპოზიუმზე ჯეფ ბეზოსმა შეკრებილ საზოგადოებას ურჩია, რომ ტუალეტი გაფრენამდე უნდა მოითავონ.

ფოტო: Blue Origin

ცხადია, არსებობს რისკი, რომ უწონადობაში გასვლის, აფრენის პროცესში მიღებული სტრესის, წნევისა და შოკის პირობებში ორგანიზმს გაუთვალისწინებელი რეაქცია ჰქონდეს და მგზავრებს ფაღარათი ან სხვა სახის ფიზიოლოგიური მოთხოვნილებები გაუჩნდეთ. ამ პრობლემის მოგვარების საშუალებად Blue Origin-ში საფენებს მიიჩნევენ.

"ასტრონავტებიც საფენებს ხმარობენ და ამაში სასირცხვილო არაფერი," განაცხადა მარკ შელჰამერმა, NASA-ს ადამიანთა კვლევების პროგრამის ხელმძღვანელმა.

ბეზოსისგან განსხვავებით, ტუალეტები გათვალისწინებულია ილონ მასკისა და SpaceX-ის ტურისტულ კაფსულა Crew Dragon-ში.