მაისურზე წარწერის გამო დაკავებულ 69 წლის შოთა ოდიშვილს 15-დღიანი პატიმრობა შეეფარდა. გადაწყვეტილება მოსამართლე ნინო ენუქიძემ მიიღო. დაკავებული გურჯაანის იზოლატორშია გადაყვანილი.

დაკავებულის ადვოკატი, გიორგი ტაბატაძე ჰყვება, რომ შოთა ოდიშვილი მაისურზე შეურაცხმყოფელი წარწერისა და პოლიციის შეურაცხყოფისთვისაა დაკავებული, რაც სიმართლეს არ შეესაბამება.

"მას შემდეგ, რაც მარში დამთავრდა, წავიდა და კანცელარიის წინ იჯდა მშვიდობიანად. ტელეფონში თამაშობდა და ამ დროს მივიდნენ პოლიციელები და უთხრეს, რომ გამომყევიო და პოლიციის მანქანაში ჩასვეს, მოათავსეს.

შემდეგ უთხრეს, რომ მაისურზე რაც ეწერა, იგი იყო შეურაცხმყოფელი და ასევე უთხრეს, რომ პოლიციელებს რატომ აგინებდიო. ამაზე უპასუხა, რომ პოლიციელებისთვის მას შეურაცხყოფა არ მიუყენებია. მიუხედავად ამისა, მაინც დააკავეს ორი მუხლით: ერთი მაისურის ნაწილში, 166-ე მუხლით (ხულიგნობით) და ასევე დააბრალეს, რომ თითქოს პოლიციელებს აყენებდა შეურაცხყოფას.

დამკავებელი იყო პოლიციის უფროსი ლადო სადღობელაშვილი და შემდეგ ოქმი გააფორმეს სხვა პოლიციელებმა, რომლებმაც თქვეს, რომ თითქოს მათ აგინებდა და შეურაცხყოფას აყენებდა.

სამხრე კამერების ჩანაწერები მოიტანეს, თუმცა იქ არანაირი გინება ასახული არ იყო. იქ ასახული არის ის, რომ ზეწოლას ახდენენ პოლიციელები, ადამიანს ეკითხებიან: "რატომ გვაგინებდი, რატომ გვაგინებდი?", რაზეც ბატონი გიორგი პასუხობს, რომ: მას არ შეუგინებია არც ერთი პოლიციელისთვის", — ამბობს ადვოკატი.

შოთა ოდიშვილი 23 აგვისტოს რუსთაველის გამზირზე გამართული აქციიდან წასული მთავრობის ადმინისტრაციასთან დააკავეს.