საქართველოს მე-5 პრეზიდენტი პატიმრობაში მყოფი ექსპრემიერის ირაკლი ღარიბაშვილის ბოლო დღეებში ციხიდან გაკეთებულ განცხადებებს გამოეხმაურა, სადაც მის მიმართ "უსამართლო" დამოკიდებულებაზე საუბრობს და აცხადებს, რომ სასამართლო პროცესში მონაწილეობას აღარ მიიღებს.

ზურაბიშვილის ამბობს, რომ ექსპრემიერმა მხოლოდ მაშინ ამხილა სასამართლო სისტემა, როცა უსამართლობა პირადად შეეხო. მისთვის ასევე გაუგებარია ის ბიძინა ივანიშვილს ებრძვის, თუ მის მიმართ ჯერ კიდევ ლოიალურია.

"რა ვთქვა, კარგი დროა, რომ ახლა ამხილა სასამართლო. რამდენი ხანია, არა მხოლოდ ჩვენ, არამედ ჩვენი პარტნიორები [ვსაუბრობთ]… რამდენჯერ მოისმინა თვით ბატონმა ღარიბაშვილმა ჩვენი ევროპელი პარტნიორებისგან შენიშვნები ჩვენს სასამართლოზე. მაშინ ამართლებდა ამ ყველაფერს და დღეს თურმე ამხილა, რადგან მას შეეხო. სანამ ადამიანებს არ ეხებათ უშუალოდ რაღაც, მანამდე ან თვალს ხუჭავენ ან ითმენენ, ან სხვაგან იყურებიან. ასეთი იყო ღარიბაშვილის პოზიცია ზუსტად.

კორუფცია ხან აღიარა, ხან არ აღიარა, ვეღარ გავიგე ზუსტად რა ხდება ამ მიმართულებით. ებრძვის, იბრძვის, "გადავედი ბრძოლაზე", მაგრამ ვის ებრძვის, ესეც გაუგებარია. ებრძვის ბიძინა ივანიშვილს, თუ ჯერ კიდევ ლოიალობას უცხადებს ბიძინა ივანიშვილს. ვის ებრძვის, ვინ არის სხვა ვინც გადაწყვეტილებებს იღებს, ვის აქვს პასუხისმგებლობა თუნდაც მის დატყვევებაზე, თუ არა ივანიშვილი, აბა ვინ. სხვები ვინ არიან. მე არ ვიცი, ზარქუა თუა დღეს მმართველი ამ ქვეყნის, თუ ვინ უნდა იყოს, ცოტა გაუგებარია. ამიტომ მისი პოზიციაც არის გაუგებარი, რაღაც უნდა რაღაცას ცდილობს, მაგრამ ბოლომდე ვერ ბედავს და ბოლომდე გარკვეული პოზიცია ნამდვილად არ გააჩნია", — თქვა სალომე ზურაბიშვილი ფეისბუქ-ლაივში.

შეგახსენებთ, რომ ციხიდან გამოქვეყნებულ რიგით მე-4 წერილში ღარიბაშვილი წერს, რომ "დაუნდობელ და უსამართლო" პოლიტიკურ ბრძოლას აწარმოებენ მის წინააღმდეგ, ამიტომ აღარ აპირებს "ამ სამარცხვინო და ქვეყნისთვის შეურაცხმყოფელ პოლიტიკურ მასკარადში მონაწილეობას". ის იმასაც წერს, რომ არც სასამართლო პროცესში მიიღებს მონაწილეობას.