საქართველოს ნარკოპოლიტიკის ეროვნული პლატფორმა მიიჩნევს, რომ საქართველოში მოქმედი ნარკოტიკული დანაშაულის მომწესრიგებელი კანონმდებლობა მსოფლიოში ერთ-ერთი ყველაზე მკაცრია, რაც ხისტად აისახება პრაქტიკაში. ამის შესახებ პლატფორმის წარმომადგენლებმა დღეს გამართულ კონფერენციაზე ისაუბრეს.

"მკაცრი სანქცია და კონკრეტული ნარკოტიკული საშუალების შემცირება არ უდრის ნაკლებ მომხმარებელს, რადგან „ნარკო ბაზარზე“ მუდმივად ჩნდება ახალი ნივთიერებები, რომლებზეც სულ უფრო ნაკლები ინფორმაცია აქვს მოსახლეობას და შესაბამისად, მისი მოხმარება მეტ რისკთან და ზიანთან ასოცირდება. ასეთ პირობებში განუზომლად დიდია ნარკოტიკის ზედოზირების და თანმდევი მძიმე შედეგების საფრთხეები," - მიიჩნევენ პლატფორმის წევრები.

არსებული პრობლემების მოსაგვარებლად პლატფორმა ახალი მოდელი შეიმუშავა, რომლითაც გათვალისწინებულია:

• მოხმარების პრევენციაზე მიმართული სისტემის დანერგვა - სასკოლო ასაკიდან მოსწავლეებისათვის ინფორმაციის მიწოდება ნარკოტიკის მოხმარების მძიმე შედეგებზე. აგრეთვე სისტემური საინფორმაციო კამპანია მოხმარების პრევენციაზე;
• შეფასების და გადამისამართების კომისიების შექმნა. კომისიების ფუნქცია, პრევენციულ აქტივობებში ჩართვის გარდა, იქნება ნარკოტიკის მომხმარებლის ჩართვა ქვეყანაში არსებულ სარეაბილიტაციო/ზიანის შემცირების თუ სოციალურ პროგრამებში;
• კონსულტირებისა და მკურნალობის სერვისების სპექტრის გაფართოება;
• ფსიქო-სოციალური რეაბილიტაციის სისტემის ჩამოყალიბება.

პლატფორმაში მიაჩნიათ, რომ ზემოაღნიშნული კომპონენტები და ზოგადად ჯანდაცვით, ფსიქო-სოციალური რეაბილიტაციის და ზიანის შემცირების პროგრამები ეფექტური იყოს, აუცილებელია სისხლისსამართლებრივი მექანიზმების ფუნდამენტური მოდიფიცირება.

"ნარკოპოლიტიკის კონტექსტში რეპრესიული მექანიზმები გამოყენებული უნდა იყოს უკიდურეს შემთხვევებში და მისი ობიექტი არა ნარკომომხმარებელი, არამედ ნარკოტიკების მსხვილი ტრანზიტი და მათი საზოგადოებაში გავრცელება უნდა იყოს," - განმარტავენ პლატფორმის წევრები და შესაბამისი კანონპროექტის მოამზადეს.

პლატფორმის მომზადებული კანონპროექტი ითვალისწინებს:

• ყველა ტიპის ნარკოტიკული საშუალების მოხმარების/მცირე ოდენობით შეძენა შენახვის დეკრიმინალიზაციას;
• სისხლისსამართლებრივი სანქციების შემსუბუქებას;
• ნარკოტიკული ნივთიერებების დოზირების სამართლიან განსაზღვრას;
• იძულებითი ნარკოლოგიური შემოწმების წესის ახლებურად ჩამოყალიბებას;
• ახალი ფსიქოაქტიური ნივთიერებებზე დაბალანსებულ და გაწონასწორებულ საკანონმდებლო რეგულაციებს;
• მსჯავრდებულთა სამართლებრივი მდგომარეობის გაუმჯობესებას.

საქართველოში ნარკოპოლიტიკის ეროვნული პლატფორმა, ნარკოტიკების მომხმარებელთა საქართველოს ქსელის ინიციატივით, გასული წლის აპრილში დაფუძნდა. მასში 41 ორგანიზაციაა გაერთიანებული.