შინაურ ცხოველებსა და მათ პატრონებს ერთმანეთთან განსაკუთრებული ურთიერთობა აკავშირებთ. ამის დასტური ინგლისში მცხოვრები რეიჩელ ლოურენსია, რომელმაც 8 თვის წინ დაკარგული კატა ვეტერინართან ტელეფონზე საუბრისას იპოვა.

რეიჩელი ვეტერინარს თავისი მეორე კატის შესახებ ტელეფონით ელაპარაკებოდა, როცა ტელეფონის მიღმა კნავილი მოესმა. ვეტერინარმა აუხსნა, რომ კლინიკაში მიუსაფარი კატა მოიყვანა. რეიჩელმა კატის კნავილი იცნო და ვეტერინარს ცხოველის აღწერა სთხოვა. აღწერა რეიჩელის დაკარგული კატის, ბარნაბის გარეგნობას ემთხვეოდა.

მიუხედავად იმისა, რომ დაკარგული კატა საკმაოდ გამხდარიყო და არცისე კარგად გამოიყურებოდა, რეიჩელმა მასში მონატრებული ოთხფეხა მეგობარი მაინც ამოიცნო. მზრუნველი პატრონი ბარნაბიმაც იცნო და კლინიკა მოსალოდნელ მოფერებებსა და ნებივრობაზე ფიქრით კმაყოფილმა დატოვა.